Bakþankar
Lára G. Sigurðardóttir

Leynimorðinginn 

Lára G. Sigurðardóttir skrifar

„Ég vil ekki deyja,“ sagði 16 ára unglingur sem var í heimsókn hjá okkur um leið og hann staulaðist til að ná sér í stórt vatnsglas. Skömmu áður hafði ég lýst áhyggjum mínum af heilsu hans eftir að hafa horft á barnið sem er í yfirþyngd borða stóran snakkpoka, sextán tommu pitsu, brauðstangir og drukkið tvo lítra af gosi.

Annað dæmi um næringu barna hér í hjarta Kísildalsins var þegar drengirnir mínir komu gapandi heim eftir fyrsta skóladaginn því helmingur skólasystkina þeirra nærðist á snakki og gosi í hádeginu. Þriðja kemur frá körfuboltamótum þar sem foreldrar eru duglegir að dæla snakki, nammi og gosi í börnin eftir leik.

Samt er talsverð vakning hér um heilsu og til dæmis sést enginn reykja sígarettur eða rafsígarettur. Nú er ég ekki að halda því fram að við gefum börnunum okkar bara avókadó og appelsínur – en þarna finnst mér full langt gengið í að halda óhollustu að börnunum.

Ástæðan er einfaldlega sú að þessi fæða er vopn í hendi leynimorðingja nokkurs sem er frægur fyrir að valda skaða og stytta líf. Hann fer hljóðlega um því við verðum ekki þess vör þegar hann byrjar að hreiðra um sig í líkamanum. Hár blóðþrýstingur er þess vegna kallaður leynimorðingi af amerísku hjartasamtökunum en hann hrjáir um þriðjung manna og er orsök flestra ótímabærra andláta undir 65 ára aldri. Oft er háþrýstingur áunninn, til dæmis ef við borðum of mikið salt eða ruslfæði.

Það er svo sem í lagi að leyfa börnunum okkar að smakka snakk en höfum hugfast að við foreldrarnir berum ábyrgð á hvaða fæði þau venjast að borða því hegðun er allt að 95% vani. Það getur aldrei verið til góðs að halda að börnunum fæði sem getur stytt líf þeirra.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Skoðun

Sjá meira


Velkomin á Vísi. Þessi vefur notar vafrakökur. Sjá nánar.