Veiði

Litla lúmska vatnið á Snæfellsnesi

Karl Lúðvíksson skrifar
Eiginkona greinarhöfunds með hörku veiði við leynivatnið sem fær að vera leyni áfram.
Eiginkona greinarhöfunds með hörku veiði við leynivatnið sem fær að vera leyni áfram. Mynd: KL

Það eru margir sem eiga sér vötn sem þeir hafa veitt vel í og segja helst engum frá því og þar af leiðandi eru þessi vötn oft nefnd leynivötn.

Undirritaður hefur síðustu ár verið vikulega í veiðispjalli á Bylgjunni yfir sumartímann hjá Gulla og Heimi á morgnana og fyrsta innslagið var í fyrradag. Í því samtali missti ég víst út úr mér að ég ætti mér leynivatn sem mér gengi oft vel í og vildi helst ekki segja frá. Það er skemmst frá því að segja að ég hef fengið nokkra pósta og símtöl þar sem vinir mínir og hlustendur hafa bent mér á að ég sem fjölmiðill eigi nú að veita upplýsingar en ekki leyna þeim. Á þeim forsendum ætti ég þá að deila því með þeim sem áhuga hafa hvaða vötn þetta eru. Þá það....

Baulárvatn, byrjum þar. Flestir keyra framhjá því á leið sinni í Hraunsfjörðinn nema þeir fari hina leiðina en þetta litla vatn við veginn fær einhvern veginn að vera ósnert sem er furða því það er virkilega fín veiði íþessu vatni og inn á milli mjög vænn fiskur. Algengar stærðir 2-3 pund og það er langsamlega best að veiða á kvöldin. Farðu í þokkalega veðri og þú færð fisk, það er bara svoleiðis. Þetta er vatnið sem ég kalla milli minna veiðivina "Litla lúmska vatnið!"

Hítarvatn, kannski augljóst en samt ekki. Það eru margir sem fara þangað og fá ekki neitt sem ég skil bara ekki. Það þurfti að vísu nokkur skipti til að læra á það og sjá hvernig fiskurinn hegðar sér en það var ekki flókið. Eftir heita daga er best að veiða hraunsmegin. Besta veiðin á morgnana og kvöldin. Ekki endilega stór fiskur en 1-2 pund svona mest af honum. Sum kvöldin sá maður boðaföll þegar torfurnar gengu upp á grynningarnar og þá er líka veisla!

Hreðavatn, enn eitt vatnið sem margir keyra bara framhjá. Þeir sem eiga sumarbústaði við vatnið þekkja það vel og eru kannski ekkert að tala of mikið um veiðina í því. Hef oft veitt mjög vel þarna og bara seinni partinn, fæ aldrei neitt á morgnana. En þau aru fá vötnin sem eru jafn falleg, umvafinn skóginum og þessu landslagi sem einkennir Borgarfjarðarsveitirnar. 

Ég á eitt leynivatn í viðbót en ætla að áskilja mér þann rétt að segja ekki frá því.....alla vega ekki strax.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.