Veiði

Frábær opnun Elliðavatns í gær

Karl Lúðvíksson skrifar
Guðjón Hlöðversson með 70 sm urriðann sem hann veiddi í gær í Elliðavatni.
Guðjón Hlöðversson með 70 sm urriðann sem hann veiddi í gær í Elliðavatni. Mynd: Veiðikortið

Ein helsta uppeldisstöð veiðimanna á höfuðborgarsvæðinu opnaði formlega fyrir veiðimönnum í gær og veiðin var mun betri en von var á.

Þegar veiði hefst í Elliðavatni mæta margir af skyldurækni til að hefja tímabilið í vatninu án þess að vera sérstaklega vongóðir um veiði því hann vill oft vera tregur til að taka fyrstu dagana. Það á kannski við á hefðbundnum fyrsta degi sumars þegar það er kalt og hryssingslegt en það átti bara ekki við í gær. Það var 14-15 stiga hiti og fallegt veður við vatnið og margir mættir strax um sjö til að ná í bestu veiðistaðina.

Fyrstu fiskarnir voru að koma á land strax um sjö leitið og það er ekki annað að heyra en að veiðin hafi verið góð um allt vatn miðað við árstíma. Það voru margir komnir með einn til tvo fiska og mesta veiðin sem við höfum haft fregnir af var veiðimaður sem var kominn með átta fiska um hádegi og allt á púpur. Það skýtur skökku við því yfirleitt er fiskurinn mest að taka litlar straumflugur á þessum tíma.

Það veiddust allar stærðir af fiskum en sá stærsti var 70 cm urriði sem Guðjón Hlöðversson veiddi en hann fékk auk þess fjóra aðra urriða. Veiðimenn sem við höfum heyrt af eru kampakátir með fyrsta veiðidaginn í vatninu en það verður þó að nefna að allir tala þeir um slælega umgengni við bakkann. Girni, gosdósir, sígarettustubbar og annað drasl skyggði aðeins á útiveruna. Við hvetjum veiðimenn til að ganga vel um þetta fallega vatn og taka upp rusl sem er við bakkann.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.