Veiði

Hlaðvarp um veiði komið í loftið

Karl Lúðvíksson skrifar

Veiðimenn fá aldrei nóg af bókum, tímaritum og sjónvarpsþáttum um veiði og í raun sækjast veiðimenn bara í allt sem tengist veiði.

Það er þess vegna fagnaðarefni þegar eitthvað nýtt bætist á þessan lista en nú er komið hlasðvarp eða podcast um veiði og veiðitengd mál. Veiðivísi barst tilkynning þess efnis og er hún hér að neðan og við óskum aðstandendum hlaðvarpsins til lukku með þetta og þessu frumkvæði eiga veiðimenn og veiðikonur landsins líklega eftir að taka fagnandi.

Það er erfitt að vera fluguveiðimaður fastur í miðjum íslenskum vetri. Það þekkja félagarnir Hafsteinn Már Sigurðsson og Sigþór Steinn Ólafsson mætavel. Til að lina þjáningar sínar, og vonandi annarra í leiðinni, og stytta biðina eftir sumrinu ákváðu þeir að búa til hlaðvarp, eða podcast, um fluguveiði. Hlaðvarpið er nú farið í loftið og ber heitið Flugucastið.

Flugucastið fær til sín einn veiðimann í hverjum þætti sem deilir veiðisögum sínum en allir viðmælendurnir hafa af nógu að taka í reynslubankanum. Þeir deila sögum af sorgum og sigrum, merkilegum veiðistöðum, gefa góð ráð fyrir ákveðna veiði eða ákveðin veiðisvæði og svo mætti lengi telja. Meðal þeirra sem þegar hafa komið fram í þáttunum eru Björn K. Rúnarsson, Eggert Skúlason og Elías Pétur Viðfjörð Þórarinsson. Nýjum þáttum er sleppt út í alheiminn á fimmtudögum og Sigþór og Hafsteinn lofa því að margar sleggjur úr veiðibransanum séu væntanlegar í þáttinn en vilja ekki gefa meiri uppi að svo stöddu heldur hvetja fólk til að fylgjast spennt með.

Umsjónarmenn þáttarins eru, eins og gefur að skilja, forfallnir veiðimenn. Sigþór Steinn hefur komið víða við í veiðibransanum undanfarin tuttugu ár. Hann hefur stundað allt frá maðkatínslu og fluguhnýtingar yfir í leiðsögn og rekstur veiðisvæða. Hann hefur dvalið átta sumur við leiðsögn í Kjarrá í Borgarfirði en komið mun víðar við í leiðsögn í gegnum tíðina. Hann kann þó best við sig á bökkum Laxár í Mývatnssveit að egna fyrir urriða með þurrflugu. Hafsteinn Már Sigurðsson er múrari, hljóðmaður, sjálfskipaður grínari og gallharður Kópavogsbúi sem fékk alvarlega veiðibakteríu á þrítugsaldri og líður hvergi betur en við árbakkann, helst á svæði IV í Blöndu eða við Hrútafjarðará.

Flugucastið er aðgengilegt á Spotify, Soundcloud og Apple Podcasts. Hægt er að fylgjast með fréttum af nýjum þáttum á Facebook-síðu Flugucastsins: https://www.facebook.com/flugucastid



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.