Félagið Vintris ehf., sem hélt utan um rekstur samnefndrar húðflúr- og snyrtistofu í Fákafeni 9, er gjaldþrota. Félagið var tekið til gjaldþrotaskipta í lok október í fyrra og lauk skiptunum um miðjan janúar.

Fram kemur í Lögbirtingablaðinu í dag að kröfur í bú Vintris hafi alls numið rúmlega 8 milljónum króna. Gjaldþrotaskiptunum lauk þó án þess að nokkuð hafi fengist upp í lýstar kröfur.

Fréttastofan reyndi að setja sig í samband við eiganda Vintris, mann að nafni Sergey Gaysin, en án árangurs. Henni lék t.a.m. forvitni á að vita hvort að nafngift félagsins, sem stofnað var í apríl árið 2017, hafi verið innblásið af afhjúpunum Panamaskjalanna, sem litu dagsins ljós í sama mánuði árið áður.

Fréttastofan virðist ekki vera ein um það að hafa átt í erfiðleikum með að ná á umræddan Sergey. Þannig greindi fyrrverandi starfsmaður Vintris frá því í lok árs 2017 að Sergey hafi yfirgefið land án þess að greiða sér þær 220 þúsund krónur sem Sergey skuldaði honum í laun.

Við brottförina hafi hann ekki látið ná í sig, hvorki í síma né á samfélagsmiðlum og því hafi starfsmaðurinn ákveðið að leita til lögreglunnar.

Samkvæmt upplýsingum frá skiptastjóra búsins var það Tollstjóri sem fór fram á gjaldþrot Vintris. Að öðru leyti vildi skiptastjóri ekki tjá sig nánar um gjaldþrotið.