Íslenska karlalandsliðið í knattspyrnu kom manni færra til Istanbul í dag því það skiluðu sér ekki allir leikmenn liðsins í flugið.
Erik Hamrén, þjálfari íslenska landsliðsins, var spurður út í þetta á blaðamannafundi í dag og þar staðfesti hann að framherjinn Viðar Örn Kjartansson spili ekki í leiknum á móti Tyrklandi annað kvöld.
Viðar veiktist eftir komuna til Antalya frá Rússlandi þar sem hann spilar með liði Ruben Kazan.
Ákveðið var að skilja Viðar eftir á hóteli íslenska liðsins í Antalya þar sem hann fær tækifæri til að ná sér góðum.
Viðar Örn Kjartansson hefur skorað 3 mörk í 22 landsleikjum en síðasta markið hans kom í sigri á Andorra í mars.
Viðar missir örugglega af leiknum við Tyrkland en vonir eru til þess að hann verði búinn að ná sér fyrir leikinn á móti Moldóvu á sunnudaginn.
Viðar veiktist og varð eftir í Antalya
