Fjárfesta í Solid Clouds fyrir 270 milljónir

Kjölur fjárfestingarfélag og aðrir tæknifjárfestar hafa fjárfest fyrir 270 milljonir króna í íslenska tölvuleikjaframleiðandanum Solid Clouds sem framleiðir herkænskuleikinn Starborne. Auk þess fékk Solid Clouds vaxtarstyrk til tveggja ára frá Tækniþróunarsjóði. Frá þessu er greint í tilkynningu frá félögunum.

Stefán Gunnarsson, framkvæmdastjóri Solid Clouds, segir mikla ánægju ríkja með fjárfestinguna og styrkinn. „Við erum ánægðir með að ljúka þessari fjármögnun og því að hafa fengið til liðs við okkur jafn öflugan og reyndan fjárfesti eins og Kjöl. Það er líka mikill styrkur og heiður að hljóta styrk Tækniþróunarsjóðs. Þessir fjármunir verða nýttir til að markaðssetja Starborne erlendis og til framleiðslu á snjallsímaútgáfu af leiknum.“

Þá segir Guðmundur Ingi Jónsson, framkvæmdastjóri hjá Kili, starfsemi Solid Clouds lofi mjög góðu og að spenna ríki fyrir verkefninu.

„Við höfum lengi haft augastað á Solid Clouds þar sem þeir eru framleiða byltingarkenndan tölvuleik sem lofar mjög góðu og við erum spenntir fyrir því að miðla til þeirra okkar reynslu af uppbyggingu tæknifyrirtækja.“

Guðmundur Ingi hefur sömuleiðis tekið sæti í stjórn Solid Clouds.