Starfsfólk leikskóla skarta UN Women húfum

Starfsfólk í leikskólanum Vinaminni í Asparfelli er duglegt við að styrkja hin ýmsu félög ár hvert. Að þessu sinni fékk UN Women á Íslandi að njóta afraksturs og starfsfólkið fékk hlýjar húfur. Sólveig Einarsdóttir leikskólastjóri segir að skólinn hafi keypt 25 húfur sem merktar eru FO eða Fokk ofbeldi. Þetta er þriðja árið sem UN Women selur slíkar húfur til styrktar konum víða um heim sem hafa þurft að þola ofbeldi.

Starfsmenn Vinaminnis nota húfurnar við útiveru með börnunum enda er hún hlý og góð í vetrarkuldanum sem nú gengur yfir landið. Sólveig segir reyndar að börnin hafi ekki getað verið mikið úti síðustu daga vegna veðursins. Hins vegar var mikið partí í leikskólanum í gær, börn og starfsmenn í búningum og það var dansað og sungið.

„Það var mikill spenningur hjá börnunum að slá köttinn úr tunnunni og skapaðist virkilega góð stemming,“ segir hún.

„Okkur fannst þetta málefni UN Women mjög þarft og vildum styrkja það,“ segir Sólveig.

„Við höfum áður til dæmis styrkt langveik börn og fleiri samtök sem styðja við börn. Allir starfsmenn fengu húfurnar og þær koma að góðum notum. Við getum síðan notað húfurnar síðar til að tala um málefnið. Krakkarnir voru mjög spenntir þegar mynd var tekin af okkur með þessar húfur og fylgdust vel með því. Við notum húfurnar í starfinu og einnig í og úr vinnu,“ segir Sólveig en umhverfis hana voru hlátrasköll og glaðværð þegar við slógum á þráðinn til hennar í gær.

Vinaminni er einkarekinn leikskóli en skólinn leggur áherslu á að styðjast við góða og gilda hugmyndafræði í leik og starfi.

Ofbeldi gegn konum og stúlkum er útbreiddasta mannréttindabrot í heiminum í dag en konur úr ólíkum stéttum hafa stigið fram hér á landi og víðar um heiminn og lýst kynbundnu ofbeldi, kynferðislegri áreitni og misbeitingu valds sem þær hafa upplifað.

Kynbundið ofbeldi er heimsfaraldur sem þrífst í öllum samfélögum heimsins og innan allra stétta, segir í tilkynningu frá UN Women.

Fokk ofbeldi húfan kostar 4.500 krónur en hún er framleidd í takmörkuðu upplagi. Nánar má kynna sér verkefnið á heimasíðunni unwomen.is