Heimildarmynd í beinni

Við verðum með fyrstu tónleika ársins í kvöld klukkan 20 og ætlum að fjalla um sjálfan Rúnar Júlíusson, eða Hr. Rokk. Þeir verða auðvitað í Hljómahöllinni sem líka hýsir Rokksafn Íslands,“ segir Dagný Magnúsdóttir, einn þremenninganna sem standa að tónleikaröðinni Söngvaskáld á Suðurnesjum sem vakið hefur athygli tvö undanfarin ár. Hinir eru Arnór B. Vilbergsson og Elmar Þór Hauksson. Saman sjá þau um að syngja, spila og segja tónlistarsögu Reykjanessins og uppselt hefur verið á flesta tónleika.

„Það má segja að um heimildarmynd í beinni sé að ræða því við segjum sögu söngvaskáldanna á milli laga og bregðum upp myndum frá ferli þeirra. Það liggur mikil vinna á bak við hverja tónleika þar sem tekin eru viðtöl við söngvaskáldin og samstarfsmenn eftir því sem kostur er og víða leitað heimilda. Ljósmyndir sýna líka bæjarbrag hvers tíma,“ lýsir Dagný. Hún segir hópinn lítið fyrir formlegheit en að mikið sé lagt upp úr afslöppuðu andrúmslofti. „Það má segja að þetta séu stofutónleikar og stundum bjóðum við gestum í sófann. Við viljum hafa allt á persónulegum nótum og ég býst við að það skíni í gegn að við þrjú skemmtum okkur manna best.“

Þau Dagný, Arnór og Elmar hafa starfað saman að ýmsum tónlistarverkefnum síðustu ár, eftir að kynni tókust með þeim í Kór Keflavíkurkirkju þar sem Arnór er organisti. Spurð hvort þau óttist ekki að verða uppiskroppa með söngvaskáld svarar Arnór: „Það er öðru nær, við eigum meira að segja kanónu eins og Gunna Þórðar eftir.“

gun@frettabladid.is