Hafnar því að tími lágrar verðbólgu sé liðinn

Aðalhagfræðingur Seðlabanka Íslands hafnar því að tími lágrar verðbólgu sé liðinn. Seðlabankinn búist við verðbólgu á bilinu tvö til tvö komma átta prósent á næstu misserum. Hann segir að engin ástæða sé til endurfjármögnunar verðtryggðra lána þótt verðbólgan sé komin upp að markmiði Seðlabankans.

Peningastefnunefnd Seðlabanka Íslands ákvað á fundi sínum í vikunni að halda vöxtum bankans óbreyttum. Meginvextir bankans, vextir á sjö daga bundnum innlánum, verða því áfram 4,25%. Í yfirlýsingu nefndarinnar þar sem fjallað er um ástæður ákvörðunar nefndarinnar er fjallað nokkuð um verðbólguhorfur. Verðbólga í janúar jókst úr 1,9 prósentum í 2,4 prósent sem einkum má rekja til hækkunar húsnæðisverðs á landsbyggðinni. Að mati peningastefnunefndar eru horfur á að verðbólga verði nálægt markmiði á árinu.

Verið fjögur ár samfellt undir markmiði

Verðbólga fór undir 2,5 prósenta verðbólgumarkmið Seðlabankans í febrúar 2014 og hefur hún haldist þar síðan. Núna eru hins vegar blikur á lofti því verðbólgan hækkaði í 2,4 prósent í janúar og er núna aðeins 0,1 prósentustigi frá markmiði. Þetta hefur verið tilefni til vangaveltna um hvort hún muni aðeins aukast úr þessu. Kristrún Frostadóttir aðalhagfræðingur Kviku banka velti því upp í grein í síðustu viku hvort tími lágrar verðbólgu væri liðinn en þar segir: „Hvort sem lesa eigi of mikið í þessa mælingu eða ekki eru verðbólgutölurnar ágætis afsökun til að velta því upp hvort tími lágrar verðbólgu sé nú að líða undir lok.“

Er tími lágrar verðbólgu liðinn? „Nei, ekki að okkar mati. Verðbólgan núna er 2,4 prósent sem ég held að allir Íslendingar eldri tvævetur myndu segja að væri tiltölulega lág verðbólga. Hún er bara komin í markmið okkar. Okkar verkefni er þá að tryggja að hún fari ekki langt fram úr því. Við getum ekki tryggt að hún verði alltaf nákvæmlega 2,5 prósent. Samkvæmt okkar spá sveiflast hún á bilinu 2,0-2,8 prósent á næstu misserum og það er bara ansi lág og stöðug verðbólga að okkar mati,“ segir Þórarinn G. Pétursson aðalhagfræðingur Seðlabankans. 

Þannig að þeir sem eru með verðtryggð íbúðalán ættu ekki að endurfjármagna og færa sig í óverðtryggt? „Nei, það held ég nú ekki.“