Suðurfrönsk stemming á Barónsstíg

Hvernig stendur á því að frönsk hjón sem eiga blómlegan rekstur í heimalandinu og það á Frönsku rívíerunni taka sig upp og flytja til Íslands og opna þar kaffihús?

Svarið er einfaldlega það að þau féllu fyrir landi og þjóð og vildu prófa að búa hér. Nú geta Íslendingar kynnst heimagerðu frönsku bakkelsi á Barónstígnum af eigin raun.

Hjónin Emilie og Stephane stofnuðu sitt fyrsta kaffihús í samstarfi við vinkonu sína í miðbæ Nice í Suður-Frakklandi fyrir tíu árum. Þau vildu opna persónulegt og hlýlegt kaffihús sem mótsvar við stórum keðjum líkt og Starbucks og lögðu áherslu á heimabakað bakkelsi.

Vinsældir kaffihússins jukust hratt og fljótlega bættu þau öðru kaffihúsi við í Nice og nokkrum árum síðar einu í Mónakó og enn öðru í bænum Cagnes-sur-Mer. Kaffihúsin heita í höfuðið á Emilie – Emilie and the cool kids – en áhugi hennar á bakstri varð kveikjan að stofnun kaffihúsanna. 

Síðasta sumar fluttu þau hjónin ásamt dóttur sinni til Reykjavíkur og opnuðu kaffihús á horni Barónsstígs og Hverfisgötu í samstarfi við Guðlaugu Gunnarsdóttur myndlistarmann og fleiri Íslendinga. Þetta er fyrsta Emilie’s kaffihúsið sem er opnað utan Frönsku rívíerunnar

„Við kynntumst þegar ég var við nám í listaháskólanum í Villa Arson, en þar var ég að læra myndlist. Eitt leiddi af öðru og ég hvatti þau til að koma í heimsókn til Íslands, þau komu margsinnis og í gegnum mig og fleiri kynntust þau landinu með öðrum hætti en hefðbundnir túristar. Þau ákváðu svo að flytja hingað og nú erum við komin á kaf í kaffihúsarekstur,“ segir Guðlaug og rýkur til að afgreiða kaffiþyrsta ferðamenn sem stungu sér inn í hlýjuna. 

Aðspurð um viðtökurnar segir Guðlaug þær vera glimrandi góðar og byggjast ekki einvörðungu á ferðamönnum og lausatraffík. 

„Við erum komnar með góðan hóp af fastakúnnum.“

Það er svo vinaleg og ljúf stemming á þessi litla kaffihúsi að jafnvel febrúarkuldinn nær ekki að lauma kuldakrumlum sínum inn fyrir þröskuldinn. En það hljóta að vera viðbrigði fyrir þessu frönsku hjón að flytja frá rívíerunni á Hverfisgötuna? 

Emilie þvertekur fyrir það. 

„Ég er ýmsu vön, er sjálf frá París og þar getur nú stundum orðið kalt. Veturinn hér truflar ekkert, auk þess er landið ykkar svo fallegt að það vegur upp kuldann.“ 

Þær stöllur bjóða upp á freistandi bakkelsi, frumlegar beyglur, súpur og allar gerðir af kaffidrykkjum. En skyldi vera mikill munur á því að reka kaffihús hér og í Frakklandi? „

Frakkar borða meira sætt, hér er meiri eftirspurn eftir matmeiri skonsum og þvíumlíku. Það er líka krafa um bakkelsi sem hentar vegan og við mætum því að sjálfsögðu,“ segir Emilie sem er alsæl með viðtökurnar og stefnir að því að kynna franskan bakstur enn frekar fyrir landi og þjóð. 

.