Vantraust

Núverandi formaður VR hefur lengi haft það fyrir vana að ráðast heiftarlega að fólki sem valist hefur til forystu innan launþegahreyfingarinnar og grafa undan starfi þess, fyrir barðinu hafa ekki síst orðið fyrirrennarar hans hjá VR (Kristinn Örn, Stefán Einar, Ólafía) og forseti ASÍ. Einu foringjarnir sem virðast hafa staðið sig almennilega að hans dómi hafa verið hann sjálfur, Vilhjálmur á Akranesi og Aðalsteinn á Húsavík. Þeir þrír eru eftirlæti Útvarps Sögu. Og í hóp þremenninganna hefur nú bæst róttækur og skeleggur formaður Eflingar.

Dropinn holar steininn. Síendurteknar ásakanir Ragnars Þórs í garð forystu ASÍ, og um leið alls starfsfólks á skrifstofu ASÍ, hafa sannarlega haft áhrif. Það getur enginn til lengdar setið undir meiðandi ummælum sem „virkir í athugasemdum“ bergmála síðan af enn meiri hörku. Ekki bætir heldur úr skák þegar gott fólk þegir og andmælir ekki ósanngjörnum málflutningi eins og hefur t.d. gerst með stjórn VR. Þar virðist varla neinn þora að áminna formanninn um að sýna kurteisi og sanngirni í samskiptum.

Ragnar Þór Ingólfsson virðist jafnharðan gleyma því að hann er formaður í stóru og breiðu stéttarfélagi og að slíkri formennsku fylgja aðrar og meiri kröfur um ábyrgð en því hlutverki að vera vonlítill þingframbjóðandi fyrir Dögun eða bálreiður pistlahöfundur í dagblaði. Ef formaðurinn gírar ekki niður yfirgengilegan yfirlýsinga-, hótana- og frasastíl sinn er hætt við því að hratt gangi á inneign hans meðal þeirra félagsmanna VR sem ekki eru á sömu línu og hann og „læka“ ekki umhugsunarlítið allt sem formaðurinn lætur frá sér fara.

Formaður VR hefur, án nokkurrar aðkomu stjórnar og trúnaðarráðs VR, boðað „formlegt“ vantraust á forseta ASÍ og er, þegar þetta er ritað, að safna liði á undirskriftalistann og segir að það muni „koma á óvart hverjir eru komnir á vagninn nú þegar af þeim formönnum sem ég hef rætt við“.

Réttur vettvangur til að velja forseta ASÍ, eða koma núverandi forseta frá ef vilji er til þess, er í atkvæðagreiðslu á þingi ASÍ. Tækifæri til slíks er ekki langt undan því að næsta ASÍ-þing verður nú í haust. Kannski reynir Ragnar Þór Ingólfsson fyrir sér í þriðja sinn á þeim vettvangi? Það kæmi ekki óvart því hann er af einhverjum ástæðum steinhættur að tala fyrir því að VR gangi úr Landssambandi verslunarmanna og ASÍ. Það má vera að tími Ragnars Þórs sé loksins kominn og hann fái á þinginu umboð meirihlutans til að spreyta sig í embætti forseta.

Höfundur situr í stjórn VR og er annar varaforseti ASÍ.