Katrín og Gunnar heimsækja slóðir vesturfara

Katrín Jakobsdóttir forsætisráðherra og eiginmaður hennar, Gunnar Sigvaldason, eru nú í Norður-Ameríku þar sem þau heimsækja Íslendingaslóðir í Kanada og Bandaríkjunum. Heimsóknin hófst í gær og stendur fram á þriðjudag.

Í tilkynningu frá forsætisráðuneytinu segir að ráðherrahjónin verði heiðursgestir á Íslendingahátíðum sem haldnar verða í Gimli í Manitoba í Kanada og Mountain í Norður-Dakóta. Munu þau taka þátt í hátíðarhöldum í tengslum við hátíðirnar.

„Ráðherrahjónin verða viðstödd ýmsa menningarviðburði og munu heimsækja staði sem tengjast vesturförunum.

Forsætisráðherra mun einnig eiga fund með Brian Pallister, forsætisráðherra Manitoba, Rochelle Squires, ráðherra Manitoba fyrir sjálfbæra þróun og stöðu kvenna, og Janice C. Filmon, fylkisstjóra Manitoba,“ segir í tilkynningunni.