Sjá um gagnageymslur fyrir ríkisfyrirtæki

Ríkiskaup hefur samið við upplýsingatæknifyrirtækið Origo um gagnageymslur og varaaflgjafa fyrir ríkisfyrirtæki í kjölfar rammasamningsútboðs. Origo bauð allt að 30% lægri verð en kostnaðaráætlun Ríkiskaupa gerði ráð fyrir. Origo er jafnframt eina upplýsingatæknifyrirtækið sem er aðili að öllum rammasamningum Ríkiskaupa er varðar upplýsingatækni.

Þetta kemur fram í tilkynningu.

„Eitt af markmiðum Origo er að vera vel í stakk búið að bregðast við síbreytilegum þörfum og þjóna viðskiptavinum betur með öflugum og hagkvæmum lausnum. Við teljum að slíkt hafi tekist í þessu tilviki,“ segir Linda Björk Waage framkvæmdastjóri Rekstarþjónustu og Innviða hjá Origo.

Linda segir að mikil aukning hafi orðið í eftirspurn eftir rekstrarþjónustu Origo, meðal annars sýni íslensk fyrirtæki útvistun á upplýsingatækni rekstri sínum ört vaxandi áhuga. Origo er nú komið með um 100 fyrirtæki í rekstarþjónustu í upplýsingatækni og 150 tæknimenn sem starfa í rekstrarþjónustu.

„Við munum halda áfram að efla þjónustuframboð Origo til hagsbóta fyrir ríkisfyrirtæki sem og aðra viðskiptavini, svo sem í kringum rekstrarþjónustu og tæknibúnað, þá gjarnan með samþættingu á öðrum lausnum í upplýsingatækni,“ segir hún enn fremur.