Icelandair flýgur til Kansas City í vor

Flugfélagið Icelandair mun hefja áætlunarflug til bandarísku borgarinnar Kansas City í mái. Verður hún 21. áfangastaður flugfélagsins í Norður-Ameríku í leiðakerfi Icelandair. Samkvæmt tilkynningu frá Icelandair verður flogið þrisvar sinnum í viku frá 25. maí til septemberloka.

„Kansas City flugvöllur er sá stærsti í Bandaríkjunum þar sem ekkert beint flug til Evrópu er í boði. Með nágrannaborgum er íbúafjöldi svæðisins um 5 milljónir og Icelandair því að opna stóran spennandi markað fyrir íslenska ferðaþjónustu og styrkja tengiflug félagsins til og frá Evrópu“, segir Björgólfur Jóhannsson, forstjóri Icelandair, í tilkynningu.

Kansas City er staðsett í miðjum Bandaríkjunum á mörkum fylkjanna Kansas og Missouri á sléttunum miklu. Saga borgarinnar tengist gjarnan villta vestrinu og amerískri menningu. Hún var heimabær útlagans Jessie James, þar teiknaði Walt Disney fyrst Mikka mús á námsárum sínum og Count Basie kynnti „swing“ tónlist fyrst á fjölmörgum jassklúbbum borgarinnar. Í dag er borgin um margt dæmigerð amerísk stórborg  sem býður upp á fjölbreytt menningar- og viðskiptalíf, vetingastaði og aðra afþreyingu.

Í tilkynningunni segir einnig að flugáætlun Icelandair í ár verði sú umfangsmesta í sögu félagsins og að Kansas City sé fjórði nýi áfangastaður Icelandair á árinu. Áður hafi verið tilkynnt að flug hefjist til Cleveland og Dallas í Bandaríkjunum og Dublin á Írlandi. Þá hafi Berlín bæst við leiðakerfið í nóvember.

Nú í vor mun Icelandair taka í notkun þrjár nýjar 160 sæta Boeing 737 MAX 8 flugvélar og verða alls 33 flugvélar nýttar til farþegaflugsins í sumar, 26 af Boeing 757 gerð og fjórar af Boeing 767-300 gerð auk nýju vélanna.