Smíðaði eftirlíkingu af Star Trek byssu

Hvað ertu gamall? „Ég er tólf ára.“

Í hvaða skóla gengur þú? „Háteigsskóla.“

Uppáhaldfagið? „Smíði.“

Hvers vegna ákvaðstu að smíða þessa endurgerð? „Ég var búinn að vera að horfa á upprunalegu Star Trek þættina og langaði að búa til eftirlíkingu. Fannst það skemmtileg hugmynd.“

Og hvað fannst smíðakennaranum? „Hann var svolítið hissa.“

Hver eru helstu áhugamál þín? „Mér finnst gaman að búa eitthvað til í höndunum. Það getur verið að smíða, teikna, búa eitthvað til úr efnivið sem ég finn,“ segir Orri sem meira að segja tekst að búa til eitthvað frumlegt og skemmtilegt þegar hann bakaði piparkökur með fjölskyldunni fyrir jólin. Að minnsta kosti dettur ekki mörgum í hug að baka og mála piparkökuhníf.

„Ég hef líka mikinn áhuga á kvikmyndagerð og langar til þess að verða kvikmyndaleikstjóri.“

Uppáhaldskvikmyndin? „Psycho eftir Alfred Hitchcock.“

Áttu mörg systkini? „Ég á einn eldri bróður, hann er þrettán ára og heitir Bjartur. Svo á ég litla systur sem heitir Tinna en hún verður fjögurra ára 23. febrúar.“

Áttu mikið af græjum til að gera allt það sem þér finnst skemmtilegt? „Það væri fínt að eiga meiri græjur. En ég nota samt það sem ég hef og finn til heima hjá mér. Það er alltaf hægt að finna eitthvað til dæmis í pappírsgámnum.“

Eru mamma þín og pabbi með þér í þessu? „Ég smíðaði hænsnakofa með pabba mínum þegar við bjuggum niðri í miðbæ. Við gerum oft eitthvað saman.“

Er eitthvað fleira sem þér finnst skemmtilegt að gera? Æfir þú til dæmis íþróttir? „Nei, ég æfi ekki íþróttir, ég hef ekki tíma fyrir það. En ég spila stundum tölvuleiki og í uppáhaldi núna er Battlefront.“