Gjaldþrot Guðmundar nam 12 milljörðum

Stefán Ó. Jónsson skrifar 28. nóvember 2018 11:28

Guðmundur Ólason sést hér lengst til hægri, við aðalmeðferð í Héraðsdómi Reykjavíkur haustið 2013. Vísir/Boði

Alls voru næstum 12 milljarða króna kröfur gerðar í þrotabú Guðmundar Ólasonar, fyrrverandi framkvæmdastjóra Milestone. Skiptum í búið er lokið en aðeins um 86 milljónir fengust upp í kröfurnar, sem gera heimtur upp á 0,7 prósent.

Í auglýsingu í Lögbirtingablaðinu er þess getið að niðurstaða skiptanna hafi verið sú að upp í veðkröfur sem námu samtals 133.800.680 krónum greiddust 86.415.000 krónur, eða 64,58 prósent. Engum forgangskröfum var lýst í búið en ekkert fékkst upp í lýstar almennar eða eftirstæðar kröfur. Lýstar kröfur námu alls 11.992.513.193 krónum.

Karl Emil Wernersson, Steingrímur Wernersson og Guðmundur Ólason voru í Hæstarétti í maí dæmdir til að greiða þrotabúi Milestone 5,2 milljarða króna.

Milestone var í eigu bræðranna Karls og Steingríms ásamt systur þeirra Ingunni Wernersdóttur. Málið sem dæmt var í snerist um kaup þeirra bræðra á eignarhlut Ingunnar í Milestone, sem þeir létu Milestone greiða fyrir. Upphaflega var Ingunni sömuleiðis stefnt en Héraðsdómur Reykjavíkur sýknaði hana í fyrra.

Þeir Guðmundur, Karl og Steingrímur hafa áður verið dæmdir til fangelsisvistar í Hæstarétti vegna sama máls. Í þeim dómi kom fram að þeir hefðu látið Milestone ehf. efna samninga þeirra við Ingunni og greitt henni rúma fimm milljarða króna.

Milestone-málið Gjaldþrot

Tengdar fréttir

Milljarðakröfur í þrotabú Karls Wernerssonar

Kröfulýsingarfresti er lokið í þrotabú Karl Wernerssonar.

2. júlí 2018 14:55

Milljarðadómur yfir Milestone-mönnum staðfestur

Karl Emil Wernersson, Steingrímur Wernersson og Guðmundur Ólason voru í Hæstarétti í dag dæmdir til að greiða þrotabúi Milestone 5,2 milljarða króna. Hæstiréttur staðfesti þar með niðurstöðu Héraðsdóms Reykjavíkur í fyrra.

17. maí 2018 16:10

Milljarðs greiðsla Aurláka til Milestone staðfest

Hæstiréttur hefur staðfest dóm Héraðsdóms Reykjavíkur frá því í september 2016.

1. febrúar 2018 15:51

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.