Sjá einnig: Don Johnson vildi of margar milljónir
Leyfið í hús á föstudegi og opnað á laugardegi
Veitingamaðurinn Gunnsteinn Helgi er einn eigenda og framkvæmdastjóri Miami Hverfisgötu. Hann segir í samtali við Vísi að stemningin á opnunarkvöldinu þann 18. ágúst síðastliðinn hafi verið afar góð.„Við fengum leyfið á föstudeginum og opnuðum á laugardeginum, Menningarnótt. Það var líf og fjör, fullt hús og mér virtist fólk taka vel í þetta enda er ekki til staður líkur þessum neins staðar í heiminum.“
Memphis-Milano og Miami Vice
Eins og áður sagði hefur Miami Hverfisgata einna helst vakið athygli fyrir litríka innanhúshönnun. Daníel Freyr Atlason, einn stofnenda hönnunarfyrirtækisins Döðlur, sá um hönnun staðarins, sem einkum er innblásin af tísku níunda áratugarins og enn fremur af sjónvarpsþáttunum Miami Vice.„Upphaf „eitís“-tískunnar má rekja til Memphis-Milano og þetta varð síðar einnig grunnurinn að Miami Vice-þáttunum. Þeir ætluðu að vera svolítið evrópskir, sendu spæjara til Mílanó til að hitta þetta fólk og þessa hönnuði. Þetta er ástæðan fyrir því að Miami Vice skar sig svona úr öðru í heiminum,“ segir Gunnsteinn Helgi.
„Hugmyndin að staðnum byggir í rauninni á þessu „mixi“, þessari Memphis Milano-tísku og svo á Miami Vice-þáttunum, framúrstefnulegri „eitís“-hönnun.“
Enginn gert athugasemdir við teppin
Þá er þess vandlega gætt að allt á staðnum sé í umræddum stíl. Þar má nefna kokteilana, sem byggðir eru á kokteilseðlum bara í Miami á níunda áratugnum, tónlistina og sérsaumaða, hvíta jakka á starfsfólkið.Önnur hæð staðarins er auk þess teppalögð kóngabláu teppi. Aðspurður segir Gunnsteinn Helgi að enginn hafi gert athugasemdir við teppið, sem mætti teljast djarft gólfefnaval á stað þar sem fljótandi veigar eru hafðar um hönd.
„Nei, við erum með sérfræðing á því sviði sem kemur hér á hverjum morgni og djúphreinsar teppin.“
Gunnsteinn Helgi segir jafnframt að svokallaður „happy hour“ Miami, þar sem tilboð er á drykkjum, sé einn sá lengsti á Íslandi.
„Við opnum klukkan þrjú alla daga og erum með opið fram eftir, bara eftir stemningu. Svo erum við með einn lengsta „happy hour“ Íslands frá þrjú til átta. Fólk getur komið og fengið sér vín, bjóra og kokteila. Við erum til dæmis með gin og tónik á krana.“
Fóru aðrar leiðir vegna Framsóknarmanna
Til stóð að opna Miami Hverfisgötu í maí en ekkert varð úr því vegna deilna eigenda staðarins við Framsóknarflokkinn, sem á rými á efri hæðum hússins og rekur þar starfsemi.Deilurnar sneru til að mynda að salerni fyrir fatlaða en fyrri eigendur höfðu gert samning við Framsóknarmenn um samnýtingu á salerninu. Þeim samningi var hins vegar rift og þvertóku eigendur efri hæðanna fyrir að deila salerninu með bareigendum, líkt og greint var frá á vef Fréttablaðsins. Leyfi fyrir starfsemi Miami Hverfisgötu fékkst því ekki fyrr en föstudaginn 17. ágúst, þar eð salerni fyrir fatlaða var ein af forsendum leyfisins.
„Við fórum bara aðrar leiðir, fórum aftur í framkvæmdir, gerðum ný salerni og breyttum þessu,“ segir Gunnsteinn. „Þetta tafðist auðvitað svolítið mikið út af þessu máli en allt er gott sem endar vel.“
The Lights are up - we will open at 15:00 - See you soon pals
A post shared by Miami Hverfisgata (@miami_hverfisgata) on Aug 18, 2018 at 7:37am PDT
