Samfelld bílaruna frá Sandskeiði að Norðlingaholti

Mikil umferð er á Þjóðvegi 1 á leiðinni inn í Reykjavík. Bílar mjakast hægt og rólega áfram inn í borgina utan af landi eftir verslunarmannahelgina. Bjarni Dagur Jónsson, bílstjóri á leiðinni í bæinn segir að það sé „gríðarleg umferðarteppa og bíll við bíl alveg frá Sandskeiði að Norðlingaholti.“

Hannes Guðmundsson hjá umferðardeild lögreglunnar staðfestir að um mikla umferð sé að ræða á Þjóðvegi 1 á lokakílómetrunum inn í Reykjavík.  Ekki hafa borist fregnir af neinum slysum vegna umferðarteppunar.

Lögregla getur ekki sagt til um eins og staðan er núna hvenær umferðin muni róast.