Alls 2,8 milljarða króna velta í Stokkhólmi með bréf Arion banka

Viðskiptin með hlutabréf í Arion banka fóru rólega af stað í Reykjavík en 61 viðskipti voru í Kauphöll Íslands í veltu sem nam 73 milljónum króna. Dagslokaverð var 88,8 sem þýðir 18,4 prósenta hækkun.

Öllu meiri velta var í Stokkhólmi en þar voru 7.269 viðskipti í veltu sem nam rúmlega 230 milljónum sænskra króna, jafnvirði 2,8 milljarða íslenskra króna. Hækkuðu bréfin um 11,5 prósent í dag í Kauphöllinni í Stokkhólmi.

Alls voru 28,75 prósent af heildarhlutafé í Arion banka seld samhliða skráningu bankans á hlutabréfamarkað. Seljendur bréfanna voru Kaupskil, dótturfélag Kaupþings og fjárfestingarfélagið Trinity Investments sem er í eigu Attestor Capital.

Mikil umframeftirspurn var eftir bréfum og fengu fjárfestar aðeins brot af því sem þeir skráðu sig fyrir í almenna hluta útboðsins. Útlendingar keyptu 70 prósent af þeim bréfum sem voru seld að þessu sinni.

„Ég held að það sé bara jákvætt fyrir bankann að draga að fjölbreyttari flóru fjárfesta en við þekkjum hér. Við höfum líka horft til þess að það geti verið mjög jákvætt fyrir umhverfið. Þegar það koma svona margir erlendir inn í fjárfestamengið hér þá verður meiri áhugi á öðru sem er að gerast hér og við bindum vonir við að það geti falist dýnamík fyrir atvinnulífið og kauphöllina í þessari frábærlega vel heppnuðu skráningu Arion banka,“ segir Höskuldur Ólafsson bankastjóri Arion banka.