Íþróttafréttamaður kýldi kollega sinn á hafnaboltaleik

Það var óvæntur hasar í stúkunni á hafnaboltaleik hjá Milwaukee Brewers um síðustu helgi.

Þá gerði íþróttafréttamaðurinn AJ Bayatpour sér lítið fyrir og kýldi kollega sinn af annarri sjónvarpsstöð í andlitið.

Hvorugur var á vakt heldur voru þeir að njóta lífsins í stúkunni með kaldan í hægri og pylsu í vinstri.

Bayatpour var með leiðindi við eina samstarfskonu sína sem er í sambandi með íþróttafréttamanni á annarri stöð. Er hann tók upp hanskann fyrir kærustuna þá fékk hann einn á lúðurinn frá Bayatpour og steinlá.

Bayatpour var handtekinn og gisti fangageymslur um nóttina. Ekki er víst hvort hann haldi vinnunni eftir þessa uppákomu.