Talar opinskátt um eggjagjöfina

Ninna Karla Katrínardóttir er í miðju eggjagjafarferli vegna þess að hana langar að aðstoða fólk í frjósemisvanda við að láta draum sinn rætast. Ninna hefur talað opinskátt um eggjagjöf og vill þannig velja fólk til umhugsunar.

„Ég byrjaði á fyrstu lyfjunum fyrir viku,“ segir Ninna. Meðferðin getur tekið tvær til þrjár vikur og Ninna vonast til að hún skili því að tvær konur fái egg frá henni. Þess má geta að núna eru 78 konur á biðlista eftir eggi hjá LIVIO Reykjavík, sem áður hét IVF-klíníkin.

„Mér finnst þetta eitthvað svo sjálfsagt. Ég á tvö börn og ætla mjög líklega ekki að eignast fleiri. Ég átti börnin mín mjög auðveldlega og mér þykir mjög leiðinlegt að allir geti ekki eignast börn sem vilja það,“ segir Ninna spurð út í af hverju hún vilji gefa egg. „Ég á sjálf fullt af eggjum sem ég hef ekkert með að gera. Og það eru konur sem þurfa á þeim að halda.“

Þetta verður í annað sinn sem Ninna gefur egg. „Ég var búin að ætla að gera þetta í mörg ár en einhvern veginn frestaði þessu alltaf. En það var svo í fyrra sem vinkona mín hafði samband við mig og bað mig hreinlega um að gefa sér egg, vegna þess að hún og maðurinn hennar voru að reyna að eignast barn.“

„Þá loksins dreif ég í þessu og gaf þeim egg, sem reyndar varð ekki að barni, því miður.“

Í þetta sinn er hún ekki að gefa vinkonu egg. „Núna er ég bara að gefa egg almennt og þá fá mögulega tvær konur egg frá mér,“ útskýrir Ninna. Hún mun ekki fá upplýsingar um hvert eggin hennar fara en hún ætlar þó að vera svokallaður „þekktur gjafi“. „Maður getur valið hvort maður er þekktur gjafi eða óþekktur. Að vera þekktur gjafi þýðir að barnið sjálft getur fengið upplýsingar um mig og leitað að mér þegar það er orðið 18 ára. Mér finnst það mjög mikilvægt að hafa þetta þannig vegna þess að við erum á Íslandi, þetta er svo lítið land. Og bara vegna þess ef barnið myndi t.d. kynnast mínum börnum,“ segir hún og hlær.

Ninna segist ekki vera búin að hugsa mikið út í hvernig það yrði ef barnið eða börnin sem yrðu til úr eggjum hennar kæmu svo bankandi upp á eftir tvo áratugi. „Ég veit ekki. Ég myndi örugglega bara taka því með opnum örmum. Maður þarf náttúrulega að gera ráð fyrir að það geti gerst. Maður tekur bara á því þegar þar að kemur. En ég held að það yrði bara skemmtilegt,“ segir Ninna glöð í bragði.

Þess má geta að þótt konur sem gefa egg fái ekki að vita hvert eggin þeirra fara þá fá þær samt upplýsingar um hvort aðgerðin hafi heppnast „Það er ágætt að fá þær upplýsingar, því þá fær maður smá svona „closure“.“

Passað vel upp á eggjagjafannNinna segir sjálft eggjagjafarferlið í fyrra hafa gengið vel og að það hafi ekki valdið henni miklum líkamlegum óþægindum.

„Ég fann auðvitað aðeins fyrir þessu því maður er að sprauta sig með miklu af hormónum.“

„En svo er auðvitað misjafnt hvernig þetta fer í konur. Ég var aðeins þrútin í kringum magasvæðið og varð alveg rosalega meyr, ég grét yfir öllu eins og ég væri ólétt,“ segir hún og skellir upp úr. „Svo á eggheimtudeginum þá varð ég smá slöpp og líka í tvo, þrjá daga eftir á. Annars fylgdu þessu ekki mikil óþægindi myndi ég segja. Það er passað vel upp á mann.“

Vill vekja fólk til umhugsunarNinna hefur talað opinskátt um eggjagjöfina á Snapchat og vonar að það veki aðrar konur til umhugsunar. Áhugasamir geta fylgst með Ninnu á Snapchat en notandanafn hennar er ninnakarla. „Ég vona að aðrar konur sem geta gefið egg sjái að þetta er minna mál en maður heldur,“ segir Ninna sem er þeirrar skoðunar að það vanti upp á upplýsingar um eggjagjöf.

„Ég held að fáir séu að pæla í þessum möguleika og maður heyrir lítið um að það vanti eggjagjafa. En það er mikil þörf á eggjum og það er tveggja ára biðlisti eftir eggi hjá Klíníkinni. Það er hrikalega langur tími.“

Ninna bætir að lokum við: „Mér finnst dásamlegt að hugsa til þess að ég geti gefið fólki tækifæri til að eignast barn, fólki sem er kannski búið að láta sig dreyma um að eignast barn í mörg ár.“