Háski fyrir hugaða krakka

Kjarkmiklum krökkum er boðið að taka þátt í háskaleik í Borgarbókasafninu í Grófinni á Safnanótt í kvöld og takast á við voðalegar áskoranir. Í lokin fá öll börn verðlaun fyrir áræðni og kjark.

Kynjaverur og vættir hafa fundið sér íverustað í öllum krókum og kimum Borgarbókasafnsins í Grófinni í kvöld. Á Safnanótt vakna þær til lífsins og fara á kreik þegar dimma tekur.

Á Háskaleikunum geta hugaðir krakkar kíkt í leyniklefa Harrys Potter þar sem margar kynjaverur leynast og átök við Lord Voldemort, varúlfa og vitsugur. Börnin lenda líka í töfraheimi Narníu þar sem þau stíga inn í ævintýraheim ljóss og lita og hitta fyrir glitrandi og seiðandi ævintýra- og furðuverur.

Á vegi hugumstórra barna verður líka ógeðskassi þar sem starandi augu veltast um í kaldri leðju slors og hors innan um snáka og snigla og víst að þar þarf hug og þor til að þreifa ofan í kassann. Maðurinn magri fær líka hárin til að rísa og þeir allra hugrökkustu geta litið við hjá Quasimodo, kroppinbaknum voðalega í kirkjuturninum en þar er eins gott að rata aftur út.

Komdu og skoðaðu í líkkistuna mína

Það er aðeins á færi hinna allra huguðustu að feta sig í gegnum voðalegt völundarhús þar sem hætturnar leynast í hverju horni, og úr kirkjugörðunum skríða uppvakningar og beinagrindur úr opnum gröfum, og spurning hvort einhver þorir að leggjast í líkkistuna?

Á Háskaleikunum eru líka dimm og djúp göng þar sem allt getur gerst og enginn veit hvað leynist í iðrum jarðar. Þar geta kjarkaðir krakkar skriðið í gegn og sigrast á óttanum við hið ókunnuga. Að síðustu verður veitt höfuðlausn. Munu börnin halda höfði eða enda sem höfuðréttur óvættarinnar? Til þess þurfa þau að fara undir borðið og sjá hvort þau haldi haus. Rúsínan í pylsuendanum verður koldimmt karókí þar sem hægt verður að velja úr sautján þúsund lögum frá klukkan 21 til 23.

Heimsdagur barna

Á morgun, laugardag, verður haldið upp á Heimsdag barna í öllum menningarhúsum Borgarbókasafnsins. Þá gefst börnum og fjölskyldum þeirra tækifæri til að taka þátt í fjölbreyttum smiðjum og ævintýrum í menningarhúsunum Árbæ, Gerðubergi, Grófinni, Kringlunni, Sólheimum og Spönginni.

Í ár hafa myrkraverur tekið yfir söfnin: draugar, nornir, beinagrindur, skrímsli og uppvakningar. Boðið verður upp á búningasmiðjur, föndursmiðjur, slímgerð og getraunir.

Háskaleikarnir fara fram í Grófarhúsi, Ljósmyndasafninu og Borgarskjalasafninu frá klukkan 18 til 21 í kvöld, 2. febrúar 2018. Heimsdagur barna stendur yfir frá klukkan 13 til 17 á morgun, laugardaginn 3. febrúar. Aðgangur er ókeypis og allir velkomnir. Nánari upplýsingar um dagskrá á Safnanótt a vetrarhatid.is.