Ætlar að safna flugtímum á heimasmíðaðri flugvél

Íslenskur nemandi í atvinnuflugi ætlar að safna flugtímum á heimasmíðaðri flugvél. Hann hefur undanfarna mánuði unnið að því ásamt föður sínum að setja saman vélina sem kom í fleiri þúsund pörtum frá Ítalíu í einum stórum kassa. Askur Freyr Árnason leggur stund á nám í atvinnuflugi en í frístundum sínum dundar hann sér við að setja saman litla flugvél í bílskúrnum. Áhugann er ekki langt að sækja.

„Pabbi hann er búinn að vera með mér í þessu, ég er búinn að taka minni hlutann í rauninni útaf skólanum. Þetta er sem sagt þriðja flugvélin sem að hann smíðar þannig að hann hefur bara gaman af þessu,” segir Askur í samtali við Stöð 2.

Um er að ræða 100 hestafla tveggja sæta flugvél af gerðinni Savannah S og er smíðin vel á veg komin. „Þetta voru einhverjir nokkur þúsund bútar líklegast, kom bara í ágúst í fyrra og við erum núna búnir með 400 tíma og hún er núna eiginlega að verða reddý.“

Ekki er um ódýrt áhugamál að ræða en vélin, ósamsett í kassanum frá Ítalíu, kostar um 7,5 milljónir íslenskra króna. Við það bætist svo tollur og ýmis kostnaður við aðra varahluti. Feðgarnir hafa undanfarna mánuði skrúfað vélina saman samkvæmt ítarlegum leiðbeiningum en Askur hafði áður lært rafvirkjun svo það vafðist ekki fyrir honum að tengja rafmagnið.

Nú bíður hann eftir að fá vottun frá Samgöngustofu svo hann geti farið í loftið á vélinni og safnað flugtímum í atvinnuflugmannsnáminu. „Ég þarf að safna mér upp 300 tímum áður en ég get sótt um vinnu, þannig að það verður gert bara á þessa,” segir Askur.

Vélin hefur fengið nafnið TF-ASK, sem vísar til nafns eigandans, en Askur kveðst vita um sjö sambærilegar flugvélar hér á landi. En hverjum ætlar hann að bjóða með í fyrsta túrinn? „Það er spurning, ætli við pabbi tökum ekki fyrsta rúntinn,“ segir Askur.