Guðrún nýr forstjóri Framkvæmdasýslunnar

Bjarni Benediktsson, fjármála- og efnahagsráðherra, hefur skipað Guðrúnu Ingvarsdóttur í embætti forstjóra Framkvæmdasýslu ríkisins.

Í tilkynningu frá ráðuneytinu kemur fram að Guðrún sé með M.Sc. próf í stjórnun og stefnumótun frá viðskiptafræðideild Háskóla Íslands þar sem lokaverkefni hennar fjallaði um umbætur í samkeppnishæfni íslensks byggingariðnaðar. Auk þess er hún með M.Sc. gráðu í arkitektúr og löggildingu sem arkitekt.

„Guðrún hefur víðtæka reynslu af bygginga- og húsnæðismálum en hún hefur undanfarið starfað í velferðarráðuneytinu sem verkefnastjóri innleiðingar á aðgerðaráætlun stjórnvalda í húsnæðismálum. Áður starfaði Guðrún um árabil hjá Búseta sem forstöðumaður þróunar og nýframkvæmda. Guðrún starfaði um 12 ára skeið sem arkitekt og hönnunarstjóri hjá Arkþing og Arkís. Hún hefur jafnframt komið að ýmissi hagsmuna- og greiningarvinnu innan málaflokksins hérlendis og á norrænum vettvangi og sinnt verkefnum sem varða hönnun og hönnunarstýringu við skipulags- og mannvirkjagerð.

Alls bárust 28 umsóknir um stöðu forstjóra en þrír drógu umsóknir sínar til baka.

Hlutverk Framkvæmdasýslu ríkisins er að vera leiðandi afl á sviði opinberra framkvæmda með það að markmiði að bæta verklag og auka skilvirkni, hagkvæmni og gæði við framkvæmdir ríkisins. Stofnunin starfar samkvæmt lögum nr.84/2001 um skipan opinberra framkvæmda og þar eru 18 starfsmenn,“ segir í tilkynningunni.