Landsvirkjun gefur út græn skuldabréf á Bandaríkjamarkaði

Landsvirkjun hefur samið við bandaríska og breska fagfjárfesta um útgáfu grænna skuldabréfa í gegnum lokað skuldabréfaútboð á Bandaríkjamarkaði að fjárhæð samtals 200 milljóna Bandaríkjadala. Þetta kemur fram tilkynningu frá Landsvirkjun.

Bréfin eru án ríkisábyrgðar og tengjast framkvæmdum við Þeistareykjavirkjun og Búrfell 2. Landsvirkjun hefur útbúið grænan ramma um skuldabréf samkvæmt viðmiðum ICMA um slík bréf. Andvirði útgáfunnar verður ráðstafað til verkefna í orkuvinnslu með endurnýjanlegum orkugjöfum sem hafa jákvæð umhverfisáhrif.

Landsvirkjun er fyrsti útgefandi grænna skuldabréfa á Íslandi en við útgáfu grænna skuldabréfa fær útgefandi lán frá fjárfestum þar sem þriðji aðili vottar að andvirði skuldabréfsins verði ráðstafað í verkefni sem hafa jákvæð umhverfisáhrif, svo sem til endurnýjanlegrar og sjálfbærrar orkuvinnslu.

Þá er útgáfan með fyrstu grænu skuldabréfunum sem orkufyrirtæki gefur út í gegnum lokað skuldabréfútboð á bandaríska skuldabréfamarkaðnum og einnig með fyrstu grænu skuldabréfunum sem gefin eru út á þeim markaði.