Hlutkesti réði ákvörðun um málshöfðun í lóðamáli Sigmars og Skúla

Ákvörðun hluthafafundar félagsins Stemmu hf. um að selja fyrirtækinu FOX ehf. tvær lóðir á Hvolsvelli þar sem byggt var eldfjallasetur var til þess fallin að afla öðrum ótilhlýðilegra hagsmuna á kostnað hluthafa eða félagsins.

Þetta er niðurstaða Héraðsdóms Reykjavíkur í máli Sigmars Vilhjálmsonar gegn fyrrverandi viðskiptafélaga hans, Skúla Gunnari Sigfússyni, í gegnum félagið Sjarm og garm ehf. en félagið er í eigu þeirra beggja.

Stefnan beindist gegn félaginu Stemmu ehf. sem er í meirihlutaeigu Skúla. Sjarmur og garmur á 36 prósenta hlut í Stemmu.

Krafðist Sigmar þess að ákvörðun hluthafafundar Stemmu þann 9. maí árið 2016 þar sem samþykkt var að selja fyrirtækinu FOX ehf. tvær lóðir á Hvolsvelli þar sem byggt var eldfjallasetur yrði ógild. Ítarlega var fjallað um dómsmálið þegar aðalmeðferð þess fór fram.

Sjá einnig: „Ég hef eng­an áhuga á því að taka þátt í frek­ari viðskipt­um við Sigmar Vilhjálmsson“

Í dómi Héraðsdóms sem féll fyrir helgi en birtur var í dag kemur fram að hlutkesti hafi ráðið því að ákvörðun var tekin um málshöfðun Sjarms og garms ehf í málinu. Sem fyrr segir er félagið í eigu Skúla og Sigmars. Atkvæði féllu jöfn á hluthafafundi félagsins þann 23. desember 2016 þegar taka átti atkvæði um málshöfðunina og því þurfti að varpa hlutkesti sem virðist hafa fallið Sigmari í vil.

Fyrir dómi var meðal annars tekist á um hvort sú ákvörðun hafi verið tekin með lögmætum hætti en í dómi héraðsdóms segir að ekkert í samþykktum félagsins kveði á um hvernig með skuli fara ef atkvæði falla jöfn, því væri ákvörðunin lögleg.

Sigmar fékk betra tilboð frá Íslandshótelum

Upphaf málsins má rekja til hugmyndar sem Skúli kynnti fyrir Sigmari árið 2014 um að byggja eldfjalla- og jarðhræringasetur á Hvolsvelli. Síðar kom svo bygging hótels inn í verkefnið.

Árið 2015 fór samstarfið þó að súrna og svo fór að í september árið 2015 var lagt fram tilboð í lóðirnar sem deilt var um. Tilboðið var frá Þingvangi og FOX ehf. upp á 25 milljónir króna fyrir réttinn til bygginga á báðum lóðum. Tilboðinu var hafnað.

Sjá einnig: Sigmar segir „samlokusalann“ Skúla hafa stundað „siðlausa viðskiptahætti

Fór Sigmar þá á fund með Íslandshótelum til þess að fá betra tilboð en borist hafði í lóðirnar. Fékk hann tilboð upp á 50 milljónir króna í lóðirnar frá Íslandshótelunum en tilboðinu var ekki svarað af Stemmu.

Nokkrum mánuðum síðar var á hluthafafundi Stemmu 9. maí 2016 tekið fyrir annað tilboð frá FOX ehf. um kaup á lóðunum tveimur og öðrum réttindum upp á 25 milljónir auk annarra 15 milljóna. Var því tilboði tekið og var það ákvörðun sem Sigmar vildi fá hnekkt.

Lóðirnar mun verðmætari en þeir voru seldar á að mati matsmanna

Fyrir dómi var kynnt matsgerð og var niðurstaða hennar að virði lóðarréttindanna hafi verið umtalsvert meira en það verð sem stefndi seldi þau á, önnur lóðin væri metin á 100-110 milljónir en hin á 25 milljónir.

Í dómi héraðsdóms segir að ágreiningur um virði lóðarréttindanna hafi gefið fullt tilefni til þess að afla verðmats eða setja af stað söluferli svo að auðveldara væri að leggja mat á virði lóðanna og að stefndi yrði að bera hallann af því að það var ekki gert.

Sjá einnig: Sigmar segir sigurinn í dómsmálinu gegn Skúla vera súrsætan

„Með umræddri ákvörðun var eign stefnda ráðstafað til aðila sem tengdist ákveðnum hluthafahópi félagsins á verði sem var umtalsvert lægra en virði hennar samkvæmt fyrirliggjandi matsgerð,“ segir í dómi Héraðsdóms sem ógildi ákvörðun hluthafafundarins.

Þá þarf Stemma einnig að greiða fjórar milljónir króna í málskostnað vegna málsins, að því er segir í dómi héraðsdóms.