Köld böð í Hollywood og Faxafeni

„Fólk hefur ekkert verið úti í kulda án dúnúlpunnar en kuldaþol er eins og vöðvi. Maður getur þjálfað þetta upp,“ segir fyrsti Wim Hof kennari landsins, Þór Guðnason, en hann er nú þegar með 90 manns á Wim Hof námskeiði og seldist upp á fjögur slík nánast áður en þau voru auglýst.

„Við ætluðum að hafa tvö námskeið en það seldist upp á tveimur sólarhringum og þá bættum við einu við og það seldist upp á nokkrum klukkutímum en við enduðum á fjórum,“ segir Þór. Hann segir að í grunninn sé þetta sáraeinfalt en gríðarlega öflugt.

 „Þetta hefur gjörbreytt lífi mínu. Ég tók ADHDlyf en frá fyrstu viku fann ég að athyglin skerptist og ég hætti að taka lyfin fyrir tveimur og hálfu ári. Ég var með áreynsluastma og samkvæmt læknisráði á ég að taka sterabúst kvölds og morgna og bólgueyðandi eftir þörfum en það er eitt og hálft ár síðan ég notaði síðast astmalyf. Það er mikill ávinnungur í þessu en grunnurinn er öndun og köld böð.“

Þór segir að aðferðin sé mjög öflug og heilsueflandi enda ekki á hverjum degi sem sjálft hreystimennið Jason Statham lýsir aðdáun sinni á öðrum hreystimönnum. Það gerði hann á Facebook um miðjan mánuðinn. Þór var leiðsögumaður Hof þegar hann kom hingað til lands.

 „Þetta er einfaldasta en samt öflugasta leiðin sem ég þekki til að ná orkunni í lag og bæta sjálfan sig. Hann er búinn að koma hingað tvisvar eða þrisvar. Synti meðal annars í Jökulsárlóni. Ég fór með hann um Ísland ásamt fjölskyldu hans og var sá túr myndaður í bak og fyrir. Hann er mjög hrifinn af Íslandi og vill hafa kennarahitting hér á landi.“