Fær 75 milljóna dala lán frá Norræna fjárfestingabankanum

Landsbankinn hefur fengið 75 milljóna Bandaríkjadala lán frá Norræna fjárfestingabankanum (NIB) til sjö ára. Þetta kemur fram í tilkynningu frá Landsbankanum. Upphæðin nemur vel á níunda milljarð íslenskra króna.

Láninu er ætlað til fjármögnunar á litlum og meðalstórum fyrirtækjum á Íslandi og verkefnum tengdum umhverfismálum að því er fram kemur í tilkynningunni. Um er að ræða þriðja lánasamninginn sem NIB gerir við Landsbankann en eldri samningar eru frá árunum 2015 og 2017.

Haft er eftir Henrik Normann, forstjóra Norræna fjárfestingabankans, að samstarf bankanna hafi reynst afar farsælt. „Í samstarfi við Landsbankann getum við náð til fjölda lítilla og meðalstórra fyrirtækja á Íslandi með langtímafjármögnun í Bandaríkjadölum.“

Bætt lánskjör

Lilja Einarsdóttir, bankastjóri Landsbankans, segir að með samstarfinu fái bankinn í senn bætt lánskjör og geti betur stutt við sjálfbæran og stöðugan vöxt íslenskra fyrirtækja.

NIB er alþjóðleg fjármálastofnun í eigu átta aðildarríkja: Danmerkur, Eistlands, Finnlands, Íslands, Lettlands, Litháens, Noregs og Svíþjóðar. Bankinn lánar bæði til verkefna í opinbera og einkageiranum jafnt innan sem utan aðildarríkjanna. Lánshæfismatseinkunn NIB er AAA/Aaa frá S&P Global og Moody‘s, segir í tilkynningunni.