Íslands skorar mjög hátt á „þetta reddast“ mælikvarðanum

Ísland stendur öllum hinum Norðurlöndunum að baki í samkeppnishæfni samkvæmt úttekt IMD viðskiptaháskólans í Sviss á samkeppnishæfni ríkja. Ísland fellur niður um fjögur sæti milli ára og er í 24. sæti í úttektinni.

Viðskiptaráð Íslands kynnti í dag niðurstöður úttektar IMD viðskiptaháskólans í Sviss á samkeppnishæfni þjóða. Ísland féll niður um fjögur sæti í úttektinni milli ára og er í 24. sæti að þessu sinni. Ísland er enn talsvert að baki hinum Norðurlöndunum sem eru 6.- 16. sæti en Bandaríkin tróna á toppnum. 

Ísland er fyrir neðan hin Norðurlöndin í sautján matsþáttum af tuttugu og er framleiðni á Íslandi mun minni en á hinum Norðurlöndunum. 

„Ísland skorar mjög hátt í mælikvarða sem spyr í raun og veru, þetta reddast. Við erum í öðru sæti þar. En við komum frekar illa út í öllu sem snýr að stefnumótun og stefnufestu. Þannig að ég held að við ættum kannski að einbeita okkur að því að halda stefnufestu og horfa til lengri tíma heldur en að vera alltaf að slökkva elda. Það myndi þá skila framleiðni upp á við til lengri tíma,“ segir Konráð S. Guðjónsson hagfræðingur Viðskiptaráðs Íslands.

Skiptir samkeppnishæfni máli?

Samkeppnishæfni skiptir máli því aukin samkepnishæfni Íslands leiðir til betri lífsgæða hjá almenningi. Niðurstöður úttektarinnar leiða í ljós að hátt verðlag á Íslandi og mikil styrking íslensku krónunnar eru að draga niður samkeppnishæfni landsins. 

Konráð Guðjónsson segir að aðgerðir gegn styrkingu krónunnar ættu að vera í forgangi og að aukin fjárfesting lífeyrissjóða í útlöndum gæti vegið upp á móti gengisstyrkingu.

„Við höfum velt því upp hvort það sé skynsamlegt að setja gólf á erlendar fjárfestingar lífeyrissjóðanna því þeir eru orðnir það stórir að það er ekki mikið pláss eftir fyrir þá á íslenskum markaði og þeir búa við mikið innflæði. Ef þeir fara út er það sjálfkrafa ákveðin sveiflujöfnun á móti styrkingarþrýstingi. Þá er að minnsta kosti hægt að koma í veg fyrir að ástandi versni mikið meira,“ segir Konráð.