Eiga nú yfir helmingshlut í Össuri

William Demant Invest A/S (WDI) á nú yfir 50 prósent hlut í stoðtækjaframleiðandanum Össuri. Frá þessu er greint í tilkynningu félaganna til Kauphallarinnar sem undirrituð er af Niels Jacobsen, stjórnarformanni félags Össurar og forstjóra WDI.

WDI hefur átt hlut í Össuri síðan 2004 og er hlutur þess nú 50,02 prósent. Er stefnan sett á að eignast 50-60 prósent hlut í félaginu þegar fram líða stundir.

Í tilkynningunni kemur fram að ekki séu áform um að taka yfir félagið eða taka það af markaði. Auk þess muni WDI ekki breyta mótun félagsins, starfsemi eða stjórnendateymi.