Átta hafa dregið uppsögn sína til baka

Átta þjónustufulltrúar hjá Hörpu hafa dregið uppsagnir sínar til baka eftir að stjórn Hörpu ohf. kynnti ákvörðun sína um að tímakaup þeirra muni taka mið af samningum sem voru í gildi á síðasta ári.

Fréttablaðið greindi frá því í byrjun maí að fjöldi þjónustufulltrúa hjá Hörpu hefði sagt upp eftir fregnir af því að laun forstjóra tónlistarhússins hefðu hækkað nánast á sama tíma og þjónustufulltrúum var gert að taka á sig launalækkun í hagræðingarskyni.

Leiðréttingin sem stjórn Hörpu kynnti felst í því að frá 1. júní verði tímakaupið 26,1 prósenti yfir taxta stéttarfélagsins eða að meðaltali 2.935 krónur á klukkustund í kvöld- og helgarvinnu.

Í svari við fyrirspurn Fréttablaðsins segir Svanhildur Konráðsdóttir, forstjóri Hörpu, að fjórtán hafi kosið að ljúka störfum og að nú verði farið í það að útfæra starfslok þeirra.

Hún segir að á þriðja tug starfsumsókna liggja fyrir og stefnt er á að ljúka ráðningum þegar líður á sumarið.