GM ekki gefist upp á fólksbílum

Þó svo að Ford sé að sálga hverjum fólksbíl sínum á fætur öðrum á altari jeppa- og jepplingamenningarinnar er General Motors ekki af baki dottið í þróun og framleiðslu fólksbíla af öllum stærðum. Svo rammt kveður reyndar að í dapurri sölu fólksbíla í Bandaríkjunum að Honda selur nú fleiri jeppa og jepplinga heldur en fólksbíla þar vestanhafs. General Motors hefur engu að síður lýst því yfir að fyrirtækið hafi enn mikla trú á framtíð fólksbílsins, það ætli að þróa áfram sínar fólksbílagerðir og kynnti fyrir skömmu nýjan Chevrolet Malibu.

GM segir að markaðurinn fyrir fólksbíla telji enn 4 milljónir í Bandaríkjunum og það sé þess virði að taka þátt í slagnum um sölu þeirra, ekki síst með nánast brotthvarfi Ford í fólksbílum og að einhverju leyti líka hjá Fiat Chrysler.

Markaðsstjóri Chevrolet, Steve Majors, segir að fyrirtækið ætli að nýta sér þetta ástand og muni hvergi slaka á framboði sínu á fólksbílum. Chevrolet ætlar að þróa nýja bíla í öllum stærðarflokkum fólksbíla og eyða til þess miklu þróunarfé. GM sér fyrir sér vaxandi hlutdeild í fólksbílum á næstunni.

Sala fólksbíla var 46% allra seldra bíla árið 2014 en er aðeins 32% það sem af er þessu ári.