Hjallastefnan í útrás til Skotlands

Nýtt félag, Hjalli-model, hefur verið stofnað í Glasgow í Skotlandi. Félagið hefur fest þar kaup á leikskóla sem verður starfræktur í anda Hjallastefnunnar. Samkvæmt tilkynningu hefur verkefnið meðal annars það markmið að svara aukinni eftirspurn erlendir frá eftir menntun barna sem byggir á hugmyndafræði Hjallastefnunnar.

Í áðurnefndri tilkynningu er haft eftir Margréti Pálu Ólafsdóttur, stofnanda Hjallastefnunnar, að það hafi verið draumur hennar í yfir 20 ár að starfrækja skóla erlendis sem byggi á hugmyndafræði Hjallastefnunnar. Fyrirtækið hafi á síðasta skólaári tekið á móti meira en 270 erlendum gestum sem sýni aukna eftirspurn eftir nýjum hugmyndum í skólastarfi.

„Á síðustu tólf mánuðum höfum við kjarnað hugmyndir okkar og niðurstaðan var að áhrifaríkast væri að starfrækja leikskóla í landi sem er mátulega nálægt okkur landfræðilega og menningarlega. Við viljum læra á nýtt umhverfi og aðlaga Hjallastefnuna í áföngum – reiðubúin til að endurskapa í ljósi nýrrar reynslu. Uppeldissamtal milli landa er tækifærið okkar því að við sköpum mest og best í raunverulegu starfi með börnum, starfsfólki og foreldrum. Við erum tilbúin að taka skrefið og fundum spennandi en líka vel ögrandi tækifæri í Glasgow,“ segir Margrét Pála.

Starfsemin í Skotlandi er rekstrarlega óháð Hjallastefnunni á Íslandi.