Kendall neitar að tala um Pepsi auglýsinguna

Fyrir tveimur vikum kom út Pepsi auglýsing með Kendall Jenner í aðalhlutverki sem gerði allt vitlaust. Í kjölfarið hefur fyrirsætan lítið látið sjá sig á almennu færi þangað til um helgina þegar hún mætti á Coachella. 

Á þeim viðburðum sem hún lét sjá sig á var fjölmiðlafólki bannað að spurja hana út í Pepsi auglýsinguna frægu. Samkvæmt TMZ fengu fjölmiðlar mjög takmarkaðan aðgang að fyrirsætunni. Einnig er haft eftir fréttastofunni að ef einhver minntist á auglýsinguna mundi Kendall aldrei aftur tala við þann fjölmiðil. 

Það er greinilegt að Kendall vill gleyma þessu umdeilda verkefni sem fyrst en hún hefur ekkert tjáð sig um það frá því auglýsingin var tekin úr birtingu. Aðdáendur hennar hafa vonast til þess að hún mundi senda frá sér yfirlýsingu eða afsökunarbeiðni en ekkert slíkt hefur borist frá Kendall.