Fjárfest í fyrirtæki Ólafs fyrir rúmar 200 milljónir króna

Fjárfest var í fyrirtækinu að baki ráðningarsíðunni og smáforritinu Catapult á dögunum fyrir um 1,8 milljónir punda, eða um 239 milljónir króna.

Meðal þriggja stofnenda Catapult er Íslendingurinn Ólafur Johnson en fyrirtækið gerir fólki í þjónustugeiranum, þá sérstaklega veitinga- og hótelbransanum, auðveldara með að finna laus störf og atvinnurekendum að finna starfsfólk.

Að baki fjárfestingunni standa meðal annars sjóðurinn Global Founders Capital og fyrirferðamiklir englafjárfestar - þ.e. fjársterkir einstaklingar. Alls hefur verið fjárfest í fyrirtækinu fyrir um 4 milljónir punda, 533 milljónir króna, frá stofnun þess árið 2015.

Ólafur segir í samtali við Tech City News að Catapult hagnýti sér þróun sem aðstandendur fyrirtækisins segi að sé að verða á markaðnum.

„Sveigjanleiki er á hraðleið með að verða einn af lykilþáttunum í hamingju fólks. Þetta snýst ekki einungis um að stjórna því hvar og hvenær maður starfar. Þetta lítur einnig að fjölbreytni og framþróun. Sanngirni þarf að sama skapi að vera hluti af ferlinu,“ segir Ólafur.

„Það er það við erum að reyna að ná fram með Catapult. Markmiðið er að gera starf fólks enn frábærara og þessi nýja fjárfesting gerir okkur kleift að taka Catapult á næsta sig,“ bætir Ólafur við.

Aðstandendur fyrirtækisins segja að fyrst verði áherslan lögð á að hasla sér frekari völl á breskum markaði áður en alþjóðlegri útgáfu Catapult verði hleypt af stokkunum.