Fyrrverandi seðlabankastjórar Írlands og Kýpur veita ráðgjöf um peningastefnu

Patrick Honohan, fyrrverandi seðlabankastjóri Írlands, og Anthanasios Orphanides, sem var seðlabankastjóri Kýpur á árunum 2007 til 2012, munu veita sérstakri verkefnisstjórn á vegum íslenskra stjórnvalda ráðgjöf um peninga- og gengisstefnu til framtíðar.

Þetta kemur fram í tilkynningu frá forsætisráðuneytinu en í mars síðastliðnum skipaði Bjarni Benediktsson forsætisráðherra þriggja manna verkefnisstjórn en í henni sitja Ásgeir Jónsson, dósent við hagfræðideild Háskóla Íslands, Ásdís Kristjánsdóttir, forstöðumaður efnahagssviðs Samtaka atvinnulífsins, og Illugi Gunnarsson, fyrrverandi þingmaður Sjálfstæðisflokksins. Verkefnisstjórnin hefur það markmið að finna þann ramma peningastefnu sem til lengri tíma litið er heppilegastur til að styðja við efnahagslegan og fjármálalegan stöðugleika hérlendis.

Fram kemur í tilkynningu ráðuneytisins að á undanförnum mánuðum hafi verkefnisstjórnin átt fjölmarga fundi með fulltrúum úr fræðasamfélaginu, stofnunum sem koma að framfylgd peningastefnunnar og hagsmunaaðilum, auk þess að funda með þingflokkum. Þá hefur nefndin átt fundi með fulltrúum frá seðlabönkum og fjármálaráðuneytum í Danmörku, Noregi og Svíþjóð, og öðrum erlendum sérfræðingum.

Auk fyrrverandi seðlabankastjóra Írlands og Kýpur þá hafa nokkrir aðrir erlendir sérfræðingar þegið boð verkefnastjórnarinnar um að veita stjórnvöldum ráðgjöf við þessa vinnu. Þannig mun Sebastian Edwards, prófessor við UCLA-háskóla, sérstaklega meta aðra valmöguleika peningastefnu fyrir Ísland en núverandi verðbólgumarkmið og Lars Jonung, prófessor við Háskólann í Lundi, og Fredrik N. G. Andersson, dósent við sama skóla, fjalla um íslenska peningastefnu í norrænum samanburði.