Samþykktu tilboð í þrjár fasteignir í eigu Háskólans á Bifröst

Háskólinn á Bifröst hefur samþykkt tilboð í þrjár fasteignir skólans sem boðnar voru til sölu í vor. Samþykkið er þó háð fyrirvara um fjármögnun, en kaupendur hafa nokkrar vikur til þess að tryggja hana.

Um er að ræða tvær byggingar sem bera nafnið Sjónarhóll, en þar má finna 48 íbúðir, og fjögurra hæða byggingu, auk kjallara, að nafni Hamragarðar. Þar má finna 51 herbergi sem eru útbúin sem hótelherbergi.

Hafsteinn Sæmundsson, framkvæmdastjóri rekstrarsviðs Háskólans á Bifröst, segir í samtali við blaðið að engin önnur tilboð hafi borist í eignir skólans. Fjárfestum var meðal annars boðið að kaupa eignirnar í einu lagi, en ekki reyndist vera áhugi fyrir því.

Hafsteinn telur ekki tímabært á þessari stundu að upplýsa hvaða fjárfestar standi að baki tilboðinu eða hvert mögulegt kaupverð sé. Samkvæmt verðmati Capacent frá því í vor voru eignirnar, sem og rekstur Hótels Bifrastar, metnar á bilinu 1,5 til 2,5 milljarðar króna.

Gert er ráð fyrir að stjórnendur háskólans muni funda með kaupendunum í næstu viku. Segir Hafsteinn að þá muni málin skýrast frekar. Ekki er vitað hvernig kaupendurnir hyggjast nýta eignirnar.

Í tilkynningu frá skólanum á sínum tíma kom fram að eignirnar hefðu verið settar á sölu til að bregðast við fækkun sem hafði orðið í staðnámi hjá skólanum. Ekki væri lengur sama þörf og áður fyrir húsnæði á svæðinu. Um áttatíu prósent af nemendum skólans eru í fjarnámi.