Fjárfestir í Ghostlamp upp á eina milljón Bandaríkjadala

Brunnur vaxtasjóður mun kaupa hlutafé í Ghostlamp upp á 1 milljón Bandaríkjadala auk vilyrðis upp á 1 milljón aukalega til að stuðla að áframhaldandi stækkun félagsins. Þetta styrkir stækkunaráform félagsins næstu árin.

„Við fjárfestum eingöngu í fyrirtækjum þar sem við sjáum fram á mjög mikinn vöxt og verðmætaaukningu. Einnig þurfa fyrirtækin sem við fjárfestum í að vera skalanleg alþjóðlega. Við höfum fylgst með Ghostlamp núna í rúmlega tvö ár og sjáum að það fyrirtæki á alla möguleika til að stækka hratt og ná alþjóðlegum árangri," segir Árni Blöndal, hjá SA Framtaki, sem í samvinnu við Landsbréf stjórnar Brunni.

Ghostlamp var stofnað árið 2014 en hóf í ágúst 2016 rekstur af fullum krafti.

Ghostlamp er markaðstorg á vefnum sem auðveldar fyrirtækjum og auglýsingastofum aðgengi að áhrifavöldum á samfélagsmiðlum hvaðan æva að.

Fyrirtækin búa til auglýsingaherferð inn á vef Ghostlamp og í kjölfari sendir Ghostlamp áhrifafólki á samfélagsmiðlum boð um að taka þátt í herferðinni með því að birta herferðirnar inn á sínum miðlum. Um sex milljónir áhrifavaldar eru nú á skrá fyrirtækisins og eru þeir flokkaðir eftir áhrifum, áhugamálum, búsetu, aldri og kyni.

Stefnt er að því að velta fyrirtækisins verði fjórar milljónir Bandaríkjadala á næstu tólf mánuðum en fyrirtækið hefur nú þegar staðið að herferðum í þremur heimsálfum.

Framkvæmdastjóri Ghostlamp segist afar kátur með þessa þróun.

„Við höfum byggt upp lausn sem vinnur á allt annan hátt en fyrir er á markaðnum. Auglýsendur geta á mjög auðveldan hátt búið til herferðir á www.ghostlamp.com og fylgst með þeim. Ghostlamp birtir allt efni frá öllum þátttakendum herferðarinnar og árangur í heild sinni á einum stað, algrímur reikna svo út hversu mikið áhrifavaldar fá greitt miðað við áhrif þeirra á hverjum tíma.

Að nota Ghostlamp er ekki ósvipað og auglýsendur búa til Google-herferðir og nota Google Analytics fyrir netauglýsingar, nema hjá okkur er miðillinn fólk, áhrifavaldar sem eiga samskipti við þúsundir einstaklinga á hverjum degi. Ghostlamp tryggir að allir áhrifavaldar fái greitt fyrir að deila sköpunargleði sinni, í samstarfi við vörumerki, með fylgjendum sínum. Ghostlamp er frábært verkfæri til að vekja athygli á vörum, þjónustum, viðburðum og mörgu fleiru. Með samstarfi við Brunn fáum við ekki bara fjármagn til að fylgja stækkunaráformum okkar eftir heldur ómetanlega reynslu fólks sem hefur staðið í svipuðum sporum á undan okkur,“ er haft eftir Jóni Braga í tilkynningu fyrirtækisins.