Telur að bílaleigur gætu bætt við sig hraðhleðslustöðvum

Framkvæmdastjóri Félags íslenskra bifreiðaeigenda telur að bílaleigur gætu bætt við sig hraðhleðslustöðvum til að auðvelda útleigu á rafbílum. Einnig þurfi að marka betur stefnu stjórnvalda í rafbílum til að ná markmiðum um rafbílavæðingu. 

Fréttablaðið greindi frá því í morgun að það að kaupa rafbíla væri ein versta fjárfesting sem Bílaleiga Akureyrar/Höldur hefði gert í bílakaupum. 

„Nýtingin er ekki góð. Bíllinn kemur inn kannski á hádegi og þá þýðir það að við getum ekki leigt hann út fyrr en morguninn eftir þar sem við þurfum að hlaða hann. Þetta er enn þá of dýrt,“ segir Steingrímur Birgisson, forstjóri bílaleigunnar,“ sagði Steingrímur Birgisson, forstóri bílaleigunnar, í samtali við Fréttablaðið.

Ekki hefur því tekist vel að rafbílavæði bílaleigur en Björt Ólafsdóttir umhverfisráðherra sagði í byrjun mánaðarins að stefnt yrði að því að rafbílavæða allt landið fyrir árið 2030.

Gætu verið vaxtaverkir

Runólfur Ólafsson, framkvæmdastjóri félags íslenskra bifreiðaeigenda, telur að bílaleigur gætu bætt við sig hraðhleðslustöðvum til að auðvelda útleigu á rafbílum. Um vaxtaverki gæti verið að ræða í dag.

„Það þarf að stórbæta innviðina fyrir rafbíla. Það er reyndar farið í gang ákveðið átak sem stjórnvöld koma að með útboði á síðasta ári þannig það á að auka við og stórauka við svokallaðar hraðhleðslustöðvar vítt og breitt um landið,“ segir Runólfur í samtali við fréttastofu.

„Síðan er auðvitað hitt að aðili eins og Bílaleiga Akureyrar sem er að reka á fimmta þúsund bifreiðar, það er spurning að sá aðili ef hann er að einbeita sér að því að fara yfir í leigu á rafbílum, hafi ekki líka þá í huga að vera sjálfur með einhverskonar hraðhleðslumöguleika svo það sé hægt að stytta þennan hleðslutíma.“

Þörf á langtímalausn

Til framtíðar við rafbílavæðingu landsins telur Runólfur þó að ekki sé raunverulega mörkuð stefna stjórnvaldaþ. Umhverfisráðherra hafi farið fram með væntingar sem ná lengra en nágrannaþjóðir okkar hafa miðað við.

„Það er allt að gerast en fyrsta verkefnið að hálfu stjórnvalda er auðvitað að marka stefnu til framtíðar um samgöngur og samgöngutækni. Ekki að vera að slá um sig með einhverjum svona yfirlýsingu,“ segir hann.

„Við erum til að mynda ennþá í því að það hefur bara verið um bráðabirgðarráðstafanir að ræða varðandi niðurfellingu af gjöldum af rafbílum. Bara tjaldað til eins árs í senn. Við eigum töluvert langt í land enn varðandi að marka stefnu í anda þess sem til að mynda frændur okkar í Noregi hafa gert.“