Fögnuðu tímamótunum með myndatöku

Ljósmyndarinn Ásta Kristjánsdóttir myndaði Sóleyju Kristjánsdóttur á dögunum í tilefni þess að hún er að klára krabbameinsmeðferð. Ásta hefur myndað Sóleyju reglulega í gegnum tíðina til að fagna tímamótum, svo sem meðgöngu og brúðkaupi.

Ásta er einn stofnenda umboðsskrifstofunnar Eskimo og það var þannig sem þær kynntust. „Sóley kom á skrá til mín hjá Eskimo þegar hún var 14 ára, þannig kynntumst við. Við höfum alltaf haldið sambandi síðan og ég hef myndað hana á stórum stundum í lífi hennar.“

Krabbameinsmeðferð lokiðÞað var í lok apríl á þessu ári sem Sóley komst að því að hún væri með brjóstakrabbamein og við tók lyfja- og geislameðferð. Krabbameinsmeðferðinni er nú að ljúka. „Og núna, þegar þetta verkefni er að klárast, þá ákváðum við að taka myndir. Líka vegna þess að Sóley hefur alltaf verið með sítt hár en er alveg einstaklega glæsileg svona snoðuð,“ útskýrir Ásta sem segir mikla gleði hafa ríkt í myndatökunni.

„Við fengum tvær vinkonur okkar í lið með okkur sem komu með fullt af fallegum fötum fyrir myndatökuna. Svo var tónlistin sett í botn. Þetta var mjög gleðilegt, hún var að klára þessa meðferð og allt hefur gengið vel.“

Tvær ljósmyndir úr tökunni stóðu upp úr að mati Ástu og hún ákvað að senda þær á ítalska Vogue sem hefur birt myndir eftir hana áður.

„Og þeir ákváðu að birta eina þeirra.“

„Þetta eru líka svo skemmtilegir tímar, tímarit eru farin að birta myndir af konum á öllum aldri. Þessi steríótýpa af módeli sem var til staðar hér áður fyrr, hún er ekki lengur til,“ útskýrir Ásta og tekur fyrirsætuna Lauren Hutton sem dæmi. Hún prýðir forsíðu októbertölublaðs ítalska Vogue, 74 ára gömul.

„Við vorum einmitt að hlæja að þessu um daginn. Sóley er búin að starfa sem fyrirsæta í öll þessi ár og það er auðvitað alltaf draumur að birtast hjá Vogue. Og svo núna, þegar hún er á þessum stað í lífinu og á þessum aldri, þá gerist það,“ segir Ásta glöð.