Skemmtibátur strandaði sunnan við Húsavík

Upp úr klukkan fjögur í dag var björgunarsveitin Garðar á Húsavík kölluð út vegna skemmtibáts sem er strandaður við Kaldbaksnef rétt sunnan við Húsavík.

Björgunarbáturinn Jón Kjartansson frá björgunarsveitinni Garðari var fljótur á staðinn en einn maður var um borð. Engin hætta var þó á ferðum og var manninum komið til byggða með björgunarbátnum.

Þá vildi líka svo heppilega til að björgunarbáturinn náði skemmtibátnum af skerinu og fylgdi honum til hafnar á Húsavík.

Hér fyrir neðan má sjá myndir sem Sædís Rán Ægisdóttir úr björgunarsveitinni Garðari tók á vettvangi.