Svandís Hlín ráðin viðskiptastjóri hjá Landsneti

Svandís Hlín Karlsdóttir hefur verið ráðin í starf viðskiptastjóra Landsnets. Hún mun stýra þróun á viðskiptaumhverfi raforku ásamt því að vera tengiliður nýrra viðskiptavina og helsti þjónustutengiliður núverandi viðskiptavina.

Í tilkynningu frá Landsneti segir að Svandís hafi unnið hjá Landsneti frá árinu 2015 í starfi sérfræðings í viðskiptaskilmálum.

„Áður starfaði hún sem fjármálasérfræðingur hjá Danone AB í Svíþjóð þar sem verksviðið var m.a. ábyrgð á fjárhagsáætlun, viðskiptaþróun og áhættugreiningu. Einnig hefur hún starfað sem fagstjóri efniskaupa hjá Mannviti verkfræðistofu.

Svandís lauk meistaraprófi í iðnaðarverkfræði frá Háskóla Íslands en lokaárið tók hún í skiptinámi við KTH Royal Institute of Technology í Stokkhólmi,“ segir í tilkynningunni.

Haft er eftir Svandísi að það séu spennandi tímar framundan hjá Landsneti og að hún hlakki til að taka þátt í að þróa viðskiptumhverfi raforku enn frekar. „Við hjá Landsneti höfum m.a verið að vinna að breyttum verkferlum og leggjum mikla áherslu aukið gagnsæi og jafnræði meðal viðskiptavina“ segir Svandís Hlín.