Málmbræðsla þarf fjármagn og skuldar raforkureikninga

„Það ríkir áfram óvissa um reksturinn. Það er ekki lengur rafmagnslaust en það er ekki búið að ganga frá málum hjá RARIK,“ segir Daði Jóhannesson, framkvæmdastjóri GMR Endurvinnslu, aðspurður hvort framleiðsla í málmbræðslu fyrirtækisins á Grundartanga sé hafin á ný.

RARIK lokaði fyrir rafmagn til fyrirtækisins í byrjun janúar vegna vangoldinna raforkureikninga og í frétt Bylgjunnar kom fram að óvissa ríkti um áframhaldandi rekstur. Daði segir í samtali við Fréttablaðið að eigendur fyrirtækisins leiti nú að nýjum fjárfestum, bæði hér heima og erlendis, sem séu tilbúnir að leggja GMR til aukið hlutafé. Aðspurður hversu mikil fjárþörfin er vill Daði ekki svara því en fyrirtækið endurvinnur stál sem fellur til hér á landi.

„Þetta fyrirtæki var stofnað fyrir fjórum árum og það er búinn að vera erfiður og langur uppbyggingarfasi. Erfiðari og lengri en menn ætluðu sér og það er margt sem spilar þar inn í. Heimsmarkaðsverð á stáli er þar langstærsti þátturinn,“ segir Daði.

Umhverfisstofnun hefur ítrekað gert athugasemdir við starfsemi málmendurvinnslunnar og skráð á yfir þriðja tug frávika frá starfsleyfi. Fyrirtækið sætir auknu eftirliti vegna ítrekaðra vanefnda við að koma mengunarvörnum í viðunandi horf.

Eftirlitsskoðun stofnunarinnar í fyrirtækinu í ágúst í fyrra leiddi meðal annars í ljós að framleiðsluúrgangur var ekki varinn fyrir regni og því ekki hægt að hindra að mengunarefni bærust í jarðveg og fráveituvatn.

Þegar starfsmenn Umhverfisstofnunar fóru í aðra eftirlitsskoðun í nóvember hafði úrbótum vegna eldri útistandandi frávika seinkað og nýjar athugasemdir skráðar niður. Framleiðslunni fylgir talsvert magn úrgangsefnanna síuryks og gjalls sem innihalda þungmálma og GMR ætlaði við opnun verksmiðjunnar að endurvinna. Það hefur nú óskað eftir að fá að losa úrganginn í flæðigryfju á Grundartanga og úrskurðaði Skipulagsstofnun í desember að breytingin sé háð umhverfismati.

„Staðan er óbreytt frá þessum heimsóknum. Það eru klárlega enn mál sem þarf að ganga frá en ég vil helst ekki fara út í það núna,“ segir Daði Jóhannesson.

Eyþór Arnalds, fjárfestir og fyrrverandi oddviti Sjálfstæðismanna í Árborg, var í eigendahópi fyrirtækisins í árslok 2014 og stjórnarformaður þess þangað til í apríl í fyrra. Eyþór segir í samtali við Fréttablaðið að hann eigi í dag einungis lítinn hlut í fyrirtækinu.. Uppfærðum hluthafalista GMR hefur ekki verið skilað inn til fyrirtækjaskrár ríkisskattstjóra. 

Fréttin birtist fyrst í Fréttablaðinu