Sérfræðingar gagnrýna smíðagæði Tesla Model 3

Tesla bauð nokkrum bílasérfræðingum að skoða nýjustu eintökin af Tesla Model 3 bílnum, nýjustu afurð bandaríska rafmagnbílaframleiðandans, í sýningarrými í Brooklyn í New York um daginn. Einn sérfræðinganna, Toni Sacconaghi, sagði að smíðagæðum á bílnum væri verulega ábótavant.

Einstaka smíðahlutir hans féllu ekki rétt saman, gúmmílistar kringum rúður væru ekki á réttum stað, glerþak bílsins féll ekki rétt og saumar í innréttingunni væru heldur ekki á réttum stöðum. Svona skoðun er gjarnan nefnd “Fit and finish inspection” á ensku og víst má telja að Tesla Model 3 hafi ekki staðist þá skoðun. Að auki vildi Toni Sacconaghi meina að Tesla hafi sýnt sérfræðingunum sín allra bestu eintök, svo áhyggjuefni væri hvernig hin smíðaeintökin væru, þ.e. líklega miklu verri.

Tesla ætlar að vera komið í 5.000 bíla framleiðslu á viku af Model S bílnum seint á fyrsta ársfjórðungi næsta árs, en Tesla hefur frestað þessari dagsetningu nokkrum sinnum og á í vandræðum með að koma framleiðslunni á réttan hraða. Fyrst verður fyrirtækið þó að koma gæðamálum við smíði bílsins í rétt horf og svo virðist sem aðeins sé í land þar.

Eigendur Tesla Model S bíla hafa einnig kvartað við Tesla um döpur smíðagæði og að einstaka partar bílsins passi illa saman við aðra hluta hans, svo þetta vandamál er ekki ókunnugt Tesla.