Fjaðrandi sæti í fyrsta sæti

Safe Seat, fjaðrandi bátasæti sem verndar hrygginn, var sú viðskiptahugmynd sem vann Gulleggið 2017 í frumkvöðlakeppni sem Icelandic Startups hefur staðið fyrir árlega um tíu ára skeið.

„Milljónin kemur sér vel. Við erum að fara í þróunarfasa á bátasætinu sem við ætlum að framleiða, það er sérlega hugsað til að vernda hryggsúlu skipstjórnarmanna í vondu sjólagi,“ segir Svavar Konráðsson, einn þriggja félaga sem hlutu 1. verðlaun í frumkvöðlakeppninni Gullegginu á laugardaginn var. Félagar hans eru Birgir Fannar Birgisson og Páll Einarsson. Eliza Reid forsetafrú og Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra, afhentu verðlaunin.

Þremenningarnir hafa stofnað hönnunarstofuna Driftwood sem hjálpar fyrirtækjum með vöruþróun, teikningar og að koma hlutum í framleiðslu.

Svavar segir Birgi og Pál enn vera í hlutastarfi en kveðst sjálfur vera í sætisverkefninu í fullu starfi.

„Sætið er okkar hugmynd og verður okkar vara og ég mun vinna útreikninga og verkfræðilega hönnun sem meistaraverkefni mitt í vélaverkfræði við HÍ. Við vorum allir að vinna hjá bátasmiðjunni Rafnari og þar urðum við varir við eftirspurnina. Planið er að framleiða prufuseríu í lítilli bátasmiðju í Noregi og fara svo í fjöldaframleiðslu sem fram færi í trefjaplastverksmiðju í Lettlandi.“

Frumkvöðlakeppnin Gulleggið er tíu ára í ár. Samtals komu 125 viðskiptahugmyndir inn í keppnina þetta árið sem stóð í tvo mánuði. Þátttakendur sóttu námskeið og fengu þjálfun í mótun hugmyndanna og leiðsögn í uppbyggingu nýrra fyrirtækja.

Annað sætið hreppti S. Stefánsson & co. sem hanna hágæða útivistarfatnað einangraðan með íslenskum æðardún. 

Þriðja sætið hreppti Project Monsters sem er einstaklingsmiðaður námsleikur sem eykur færni og skilning og er ætlað að veita skólum forskot inn í framtíðina. 

 

BlissApp sigraði Val Fólksins á Nútímanum og Procura hlaut tíu klukkustunda endurgjaldslausa lögfræðiráðgjöf frá lögmannastofunni Advel.

Greinin birtist fyrst í Fréttablaðinu 14. mars 2017.