Honda og GM þróa saman vetnisdrifbúnað

Margir bílaframleiðendur horfa mjög til vetnis sem framtíðarorkugjafa bíla sinna og mikið er fjárfest í þróun þeirra þessa dagana. Meðal þeirra eru Honda og General Motors, sem tekið hafa höndum saman við þróun á vetnisdrifrás í bíla sína. Þetta hafa fyrirtækin reyndar gert í 3 ár og markmiðið er að þróa ódýrari vetnisdrifrás en áður þekkist til fjöldaframleiðslu í báðum fyrirtækjunum.

Honda og GM hafa sett umtalsvert fé í þessa þróun og nú 85 milljónir dollara í viðbót í þetta verkefni, eða um 10 milljarða króna. Fjárfestingin nú kallar á 100 ný störf og verða þau til í Bandaríkjunum. Honda hefur nú þegar sett á markað vetnisbílinn Honda Clarity FCV og er vetnisdrifrásin í honum flóknari en í þeirri sem Honda og GM eru að þróa nú.

Sú nýja verður af einfaldari gerð og með færri íhlutum. Ódýrara verður að framleiða hana, en hún er ámóta fyrirferðamikil. Þessi þróun ætti að leiða til lægra verðs vetnisbíla Honda og GM, en fram að þessu hafa vetnisbílar verið fremur dýrir. Munurinn á Honda og GM er sá að Honda hefur hafið sölu á vetnisbílum en GM ekki. GM er hinsvegar aðeins að hugsa út fyrir boxið með vetnisdrifbúnaðinn og horfir einnig til flugvéla og báta hvað drifrásina varðar.

Helsti þröskuldurinn við uppbyggingu vetnisbílaflota er einna helst talinn í vandanum við dreifingu á eldsneytinu í bílana. Uppbyggingin mun þó vafalaust eiga sér stað hratt, því margir hafa trú á framtíð vetnisbíla.