Tekjur jukust um 11 prósent á einu besta rekstrarári í sögu Nýherja

Tekjur Nýherjasamstæðunnar námu rúmlega 4,2 milljörðum króna á síðasta ársfjórðungi 2016 og jukust um 15,5 prósent frá sama tímabili árið áður. Samtals voru tekjur fyrirtækisins nærri fimmtán milljarðar á árinu 2016 og hækkuðu um ellefu prósent á milli ára. Þá var hagnaður ársins 383 milljónir og jókst um 55 milljónir frá fyrra ári.

Þetta kemur fram í ársuppgjöri Nýherja sem var birt fyrr í dag en þar er haft eftir Finni Oddsyni, forstjóra fyrirtækisins, að nýliðið rekstrarár samstæðunnar sé „með þeim betri í sögu félagsins.“

EBITDA-hagnaður Nýherja – afkoma fyrir fjármagnsliði, afskriftir og skatta – var 1.021 milljónir króna á árinu 2016 og hækkaði um liðlega sjö prósent á milli ára. Gengi bréfa Nýherja hafa hækkað talsvert síðustu vikur og mánuði en frá áramótum hafa bréfin hækkað í verði um meira en sextán prósent. Á síðustu tólf mánuðum nemur gengishækkunin hins vegar nærri 40 prósent.

Í uppgjörstilkynningu félagsins segir Finnur að tekjuvöxturinn á síðasta ári hafi verið mestur í hugbúnaðartengdri starfsemi. „Þar má nefna að viðskiptavinir Tempo eru nú nálægt 10.000 og  jukust tekjur þar um 40% á milli ára. Svipaða sögu má segja af Applicon AB, TM Software og hugbúnaðarsviði Nýherja þar sem tekjuaukning er á bilinu 20-45%.“

Þá er haft eftir Finni að bætt rekstrarafkoma félagins hafi náðst þrátt fyrir töluverðar hækkanir á launum vegna kjarasamninga og umtalsverða fjárfestingu í lausnaþróun, þjónustu og öflugri rekstarinnviðum. Hann segist finna fyrir auknum áhuga fyrirtækja og stofnana á úthýsingu upplýsingatæknirekstrar, en nýlega var greint frá slíku samkomulagi milli Arion banka og Nýherja.

„Þetta er jákvæð þróun, enda höfum við ekki áður verið  betur í stakk búin til að sinna slíkri þjónustu fyrir viðskiptavini okkar á hagkvæman og öruggan hátt,“ segir Finnur.