Segja mannleg mistök valda umdeildum verðmun

„Aðeins of gróft hjá Húsgagnahöllinni. Auglýsa 50% afslátt en gleyma upprunalega verðmiðanum ofan í einni skúffu skápsins!” Svo hljóðar Facebook færsla Ingibjargar Ingadóttur hefur, þegar þessi frétt er skrifuð, verið deilt af rúmlega fimm hundruð manns.

Með færslunni birtir Ingibjörg mynd af tveimur verðmiðum. Annars vegar þar sem upprunalegt verð bókahillu er auglýst sem 124.990 krónur og hins vegar þar sem sama bókahilla er auglýst á 99.995 krónur á fimmtíu prósent afslætti og að upprunalegt verð hennar hafi verið 199.990 krónur.

Gunnar Bachmann, forstjóri Húsgagnahallarinnar, segir að um mannleg mistök sé að ræða.

„Við erum búin að leita að þessu síðan við sáum færsluna, hvernig þetta gat gerst eða hvernig þetta hefur gerst. Þetta eru húsgögn sem eru komin á 50 prósent afslátt vegna þess að þau eru búin að vera til hjá okkur í töluverðan tíma. Við viljum bara fá þau út,“ segir Gunnar í samtali við Vísi. 

Hann segir að afsláttarmiðinn sé rangur og að upprunalegt verð vörunnar sé 124.990 krónur. Varan kosti því 62.495 krónur með afslætti. Hann segir skýringuna vera að um mannleg mistök sé að ræða vegna þess að afsláttarmiðarnir séu handunnir.

„Afsláttarmiðinn var einfaldlega vitlaus. Varan er á 124.990 krónurupprunalega og þetta Soul merki sem við erum með, skáparnir eru allir mjög svipaðir. Afsláttarmiðarnir eru handunnir og því um mannleg mistök að ræða. Varan ætti því að vera merkt 65 þúsund.“