Bækur í bland við bjór og brennivín

„Við vildum búa til sterka tengingu fyrir heimamenn á Suðurnesjum ásamt því að heiðra æskuminningar okkar héðan frá Keflavík því Arnar Gauti er uppalinn hérna og ég var mikið hér sem barn hjá ömmu og afa,“ segir Jón Gunnar Geirdal, athafnamaður en hann og góðvinur hans, Arnar Gauti Sverrisson, opna Library Bistró í hádeginu.

„Þetta leggst vel í okkur og við fögnum því að geta boðið heimamönnum á Suðurnesjum upp á upplifun sem þessa. „Hér verður líka happy hour alla daga frá klukkan 15, brunch um helgar og margt margt fleira, sem bætist í flóruna fyrir heimamenn. Það má búast við að þetta verði smekklegt, svona í ljósi þess að Arnar Gauti er með fingurna í þessu, á sínum heimaslóðum,“ segir Jón en lokafrágangur stóð yfir þegar Fréttablaðið bar að garði.

Mikil fjárfesting liggur í staðnum, öll húsgögn eru innflutt frá Dialma Brown á Ítalíu.

„Stjórnendur Park Inn Radisson hótelsins sem staðurinn tengist leituðu til okkar í vor varðandi hugmyndavinnu fyrir nýtt concept inn á hótelið. Við vinirnir tengdum okkur fyrir nokkru síðan í því sem við köllum „concept creation“ vinnu, hvort sem það eru veitingastaðir sem eru til staðar og þarf nauðsynlega að laga eða nýtt húsnæði.

Við erum svokallað „onestop­shop“ fyrir okkar verkefni. Við veljum hvert einasta húsgagn, gólfefni, liti á veggi, tónlistina og hvernig hún dreifist yfir daginn og vikuna, þróum nýjan matseðil með kokknum og þá líka hvernig réttirnir líta út þegar þeir koma út úr eldhúsinu, allar merkingar og svo sjálfa opnunina. Við erum nefnilega ekki bara að opna nýtt bistró heldur glænýja og upplifun í mat og drykk á pari við það allra besta sem gerist í París, höfuðborg bistróanna,“ segir hann.

Arnar Gauti er annálaður fagurkeri og búinn að vera með puttanna á púlsinum í heimi tísku og hönnunar í bráðum í 27 ár. Þeir félagar hafa eytt tíma erlendis til að kynna sér hina ýmsu strauma í veitingageiranum. 

„Sú vinna hefur svo sannarlega nýst okkur í þessu verkefni og svo finnst okkur líka hótelbarir vera oft þeir skemmtilegustu. Þar blandast innfæddir og erlendir gestir sem myndar þessa einstöku stemningu. Hótelið er líka nánast alltaf fullt og má því búast við miklum gír á bókasafninu okkar.

Við fundum fyrir því að heimamenn vantaði eitthvað í heimabyggð sem væri á pari við það sem þeir væru að sækja í til höfuðborgarinnar. Hér er því kominn valkostur fyrir Suðurnesjamenn að lyfta sér upp.“

Þeir félagar eru rétt að byrja – hótelbarinn er aðeins byrjunin. „Að öllum ólöstuðum fannst mér sérstaklega gaman að vinna þetta með Arnari Gauta enda náum við ótrúlega vel saman í því sem við tökum okkur fyrir hendur. Fram undan er líka fjöldi athyglisverðra verkefna sem tekið verður eftir og við félagarnir hvergi nærri hættir,“ segir Jón.